Փաստ ինֆո

Մայիսի 21-ին ՀՀ վերաքննիչ քրեական դատարանն անփոփոխ է թողել Շիրակի մարզի ընդհանուր իրավասության առաջին ատյանի դատարանի` 2013թ. փետրվարի 27-ի դատավճիռը: Վերջնականապես երկարատև ազատազրկման դատապարտվեցին երկու կանայք` Ս.Մարտիրոսյանը և Ն.Մովսիսյանը:

Նրանք մեղավոր ճանաչվեցին ՀՀ քրեական օրենսգրքի 132-րդ հոդվածի 2-րդ մասի 2-րդ և 6-րդ կետերով:

Ըստ դատավճռի` Ն.Մովսիսյանը Թուրքիա մեկնելուց առաջ պայմանավորվել է այդ երկրում բնակվող Ս.Մարտիրոսյանի հետ` «պոռնիկ արտահանելու հեռանկարի մասին»:

Այսպես. Հ.Մ.-ն գայթակղվել էր ամսական 7000-8000 դոլար վաստակելու, բնակարանի և սննդի ծախսեր չունենալու խոստումներով և Ն.Մովսիսյանի միջոցով տեղափոխվել Թուրքիա` իր համոզմամբ խնամակալ աշխատելու համար:

Սակայն քրեական գործի նյութերով` Ս.Մարտիրոսյանը կախյալ վիճակում է դրել Հ.Մ.-ին, կեղծ մարդասիրություն ցուցաբերել, նրան վաճառել տարբեր հագուստներ` գումարը հետագայում տալու պայմանով, և իբրև բնակվելու, բայց իրականում պոռնկության մեջ ներգրավելու համար նրան տեղափոխել է մարմնավաճառների հավաքատեղի` Տրապիզոնի «Իշիկ» հյուրանոց:

Ս.Մարտիրոսյանը սպառնացել է անելանելի վիճակում հայտնված Հ.Մ.-ն և շանտաժի ենթարկել` հիշեցնելով, որ ապառիկով վերցված հագուստների գումարը ենթակա է վերադարձման: Արդյունքում Հ.Մ.-ն ստիպված է եղել զբաղվել մարմնավաճառությամբ և վաստակած գումարները` մոտ 7 500 դոլար, տվել Ս.Մարտիրոսյանին:

Դատարանը Ս.Մարտիրոսյանին դատապարտել է 8, իսկ Ն.Մովսիսյանին` 7 տարվա ազատազրկման:

Հոդվածն ամբողջությամբ կարդացեք «Իրավունք Հետաքննություն» օրաթերթի` 12.06.2013թ. համարում: