Փաստ ինֆո

 

Երևանի 29-ամյաբնակիչ, անհատ ձեռնարկատեր Էդուարդ Օհանյանը հաճախակի խաղադրույքներ Էր  կատարում «Վիվարո Բեթինգե ՍՊ ընկերությանը պատկանող «Վիվարո» բուքմեյքերական գրասենյակներում և նույն ընկերությանը պատկանող «www.vivaro.am» կայքի միջոցով, որտեղ ստեղծել է նաև իր անհատական Էջը: 

 

Քննությամբ չպարզված հանգամանքներում ձեռք բերելով գործով վկա Վահագն Վարդանյանի անվամբ նշված կայքում բացված անհատական էջի տվյալները, ամբաստանյալը «խարդախություն կատարելու դիտավորությամբ, ուրիշի գույքը հափշտակելու նպատակով»՝  2012թվականի մարտի 26–ին և մարտի 27-ին  զանգահարել է   «Վիվարո Բեթինգ» ՍՊ ընկերության հեռախոսահամարին և հայտնել, թե իբր հանդիսանում է Վահագն  Վարդանյանը, այդ Էջի գաղտնաթվերը և  «www.vivaro.am» կայքում գրանցված վերջինիս անհատական Էջի հաշվին առկա գումարից ցանկություն հայտնել առաքմամբ կանխիկ ստանալ յուրաքանչյուր անգամ 200.000 ՀՀ դրամ գումար:  «Վիվարո Բեթինգ» ՍՊ ընկերությունում պարզելով, որ Է.Օհանյանի հեռախոսով ներկայացրած անհատական Էջի տվյալները իրոք համապատասխանում են Վահագն Վարդանյանի անհատական Էջի տվյալներին՝ ընկերության վարորդ -առաքիչ, գործով վկա Վահան Զոհրաբյանի միջոցով նշված գումարի առաքում է կատարվել նրան: 

 

Այսպիսով, ըստ մեղադրանքի` ամբաստանյալ Է.Օհանյանը «Վիվարո Բեթինգ» ՍՊ ընկերությանը պատճառել է զգալի չափի`   400.000 ՀՀ դրամ գումարի գույքային վնաս, ինչի համար  Էդուարդ  Օհանյանին մեղադրանք է առաջադրվել ՀՀ քրեական օրենսգրքի 178-րդ  հոդվածի 1–ին մասով՝  Խարդախությունը՝

 

Առաջադրված մեղադրանքում ամբաստանյալ Է.Օհանյանն իրեն մեղավոր է ճանաչել  և դատարանին հայտնել, որ նշված ժամանակահատվածում իր և Վահագն Վարդանյանի ընկերոջ`   Վաչիկ Ավետիսյանի հարաբերությունները սրված են եղել,  և ինքն ուղղակի նրան չի զգուշացրել նրա ընկերոջ անհատական էջի հաշվից գումարներ հանելու մասին: Նշված գումարները վերցնելիս ինքը «Վիվարո Բեթինգ» ՍՊ ընկերության առաքիչին ուրիշ անձի անունով չի ներկայացել, այլ հայտնել է, որ կայքը պատկանում է ընկերոջը, սակայն գումարներն ինքն է ստանում, ով վստահելով իրեն՝ խնդրանքը չի մերժել, քանի որ իրար ճանաչել են:   400.000   ՀՀ դրամ գումարը ստանալուց հետո այն ամբողջությամբ մուտքագրել է իր անվամբ բացված կայք էջում և խաղադրույքներ կատարել:  Ներկայումս հասկանում է, որ իր կատարած արարքը սխալ է և զղջում  է  կատարածի համար: 

 

Տուժողի ներկայացուցիչ Լիլիթ Զաքարյանը դատարանին հայտնել է, որ  «Վիվարո Բեթինգ» ՍՊ ընկերության աշխատակից Վահան Զոհրաբյանը երկու անգամ ուրիշի  տվյալներով գրանցված էջի հաշվին առկա գումարներից ստացել է 400.000   ՀՀ դրամ գումար և այն պատվիրատուի խնդրանքով առաքելով՝ պատշաճ չի ստուգել շահումը ստացողի ինքությունը: Ըստ վկայի՝ հետագայում պարզվել է, որ Վահագն Վարդանյանի տվյալներով ներկայացած անձը նախկինում, մինչև այդ դեպքը, նույն առաքիչից շահում է ստացել, որի ընթացքում ներկայացել է որպես Էդո: Ընկերությունը փոխհատուցել է Վ.Վարդանյանի 400.000 ՀՀ դրամ գումարը, ուստի՝ տուժողի ներկայացուցիչ Լ.Զաքարյանը դատարանում 400.000 ՀՀ դրամի չափով քաղաքացիական հայցի պահանջ է ներկայացրել և խնդրել դատարանին նշված գումարը բռնագանձել ամբաստանյալ Է.Օհանյանից՝ որպես հանցագործության հետևանքով ընկերությանը պատճառված գույքային վնասի փոխհատուցում: Ամբաստանյալ Է.Օհանյանի կողմից  ընկերությանը պատճառված վնասը չի հատուցվել,  և ընկերությունը չի հաշտվել վերջինիս հետ:

 

Ընկերության վարորդ-առաքիչ, վկա Վահան  Զոհրաբյանը դատարանին հայտնել է, որ երիտասարդը ներկայացել է որպես Վահագն Վարդանյան և ցույց տվել վերջինիս անվամբ ինչ–որ քարտ, որն առանց նկարի է եղել, իսկ վրան գրված է եղել Վահագն Վարդանյանի անունն ու ազգանունը: Վահագն անունով ներկայացած անձը ասել է, որ իր մոտ անձնագիր չկա և խնդրել է իր էջի հաշվից   200.000 ՀՀ դրամ շահումը հանձնել իրեն: Հաջորդ օրը` 2012թվականի մարտի 27–ին, նույն եղանակով նույն տեղում կրկին շահում է առաքել Վահագն Վարդանյան ներկայացած անձին և կրկին չի ստուգել ամբաստանյալի ինքնությունը` փոխանցելով նրան ևս 200.000 ՀՀ դրամ գումար:  Հետագայում   իրական Վահագն Վարդանյանը դիմել է «Վիվարո» ընկերությանը և հայտնել, որ առանց նրա գիտության էջի հաշվից հանվել է 400.000 ՀՀ դրամ գումար: Այդ ժամանակ էլ վկան հասկացել է, որ ամբաստանյալ Է.Օհանյանը իրեն խաբել է,  և ինքը դիմել է ոստիկանություն:

 

Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանը՝ դատավոր Վ.Գրիգորյանի նախագահությամբ, հունիսի 10-ի դատավճռով Էդուարդ  Օհանյանին  մեղավոր է ճանաչել  ՀՀ քրեական օրենսգրքի 178-րդ  հոդվածի 1–ին մասով նախատեսված հանցանքում և դատապարտել տուգանքի՝ նվազագույն աշխատավարձի չորսհարյուրապատիկի` 400.000  ՀՀ դրամի չափով: Դատավճռով Էդուարդ  Օհանյանից հօգուտ «Վիվարո Բեթինգ» սահմանափակ պատասխանատվությամբ ընկերության պետք է բռնագանձվի  400.000  ՀՀ դրամ գումար՝ որպես հանցագործության հետևանքով ընկերությանը պատճառված գույքային վնասի փոխհատուցում: