Փաստ ինֆո

Բրիտանական «Guardian» թերթը բացահայտել է ԱՄՆ-ի հետախուզական գործունեության վերաբերյալ տեղեկատվության մի շարք արտահոսքերի հեղինակին: Դա Կենտրոնական հետախուզական վարչության նախկին աշխատակից, 29-ամյա Էդվարդ Սնոուդենն է:

Հրատարակչությունը հաղորդում է, որ Սնոուդենը այժմ աշխատում է «Booz Allen Hamilton» խորհրդատվական ընկերությունում: Նրա անունը, ինչպես տեղեկացնում է թերթը, բացահայտվել է իր իսկ՝ Սնոուդենի խնդրանքով:

Ավելի վաղ «Washington Post» թերթը հաղորդել էր, որ ամերիկյան հատուկ ծառայությունները ուղիղ մուտք ունեն դեպի 9 խոշորագույն համացանցային ընկերությունների, այդ թվում նաև «Apple»-ի, «Facebook»-ի, «Google»-ի и «Microsoft»-ի սերվերներ: Հրատարակչության տեղեկություններով, հատուկ ծառայությունների գաղտնի ծրագիրը կրում է «PRISM» անվանումը:

«Guardian» թերթը փոխանցում է մայիսի 20-ին Հոնկոնգ թռած և այնտեղ հյուրանոցային համար վարձած Սնոուդենի հետևյալ խոսքերը. «Ես չեմ ցանկանում ապրել մի հասարակության մեջ, որտեղ կատարվում են այդպիսի երևույթներ: Ես չեմ ցանկանում ապրել մի աշխարհում, որտեղ այն ամենը, ինչ ես անում եմ, գրի է առնվում»:

Պատասխանելով իր ապագայի մասին՝ Սնոուդենն ասել է, որ ինքը ոչ մի լավ բանի չի սպասում:

Նրա ասելով, ինքը Հոնկոնգ է տեղափոխվել, քանի որ այնտեղ «ազատ խոսքի ավանդույթներն ավելի ուժեղ են»:

Հիշեցնենք, որ ԱՄՆ հատուկ ծառայությունների համացանցային գործունեության մասին առաջին տեղեկությունը ի հայտ եկավ անցյալ չորեքշաբթի, երբ «Guardian» թերթը հաղորդեց, որ ԱՄՆ-ի գաղտնի դատարանը հրահանգել է, որ «Verizon» հեռակապային ընկերությունը իրեն փոխանցի այդ երկրի Ազգային անվտանգության ծառայությանը ուղղված միլիոնավոր հեռախոսազանգերի մասին տվյալներ:

Այնուհետև «Washington Post» թերթը հաղորդել է, որ ամերիկյան հատուկ ծառայությունները ուղիղ մուտք ունեն դեպի խոշորագույն համացանցային ընկերությունների սերվերներ և, որ հրատարակչության ունեցած տեղեկությունների համաձայն, հատուկ ծառայությունների այդ գաղտնի ծրագիրը կրում է «PRISM» անվանումը: