Փաստ ինֆո

«Պռոշյանի գյուղապետի սպանության համար Արայիկ Պետրոսյանին առաջադրված մեղադրանքը անհիմն է»,- այսօր լրագրողների հետ հանդիպման ժամանակ ասաց նրա փաստաբան Գիվի Հովհաննիսյանն ու հավելեց, որ արդեն երկրորդ անգամ Արայիկ Պետրոսյանի նկատմամբ խափանման միջոց ընտրված կալանքը երկարացվել է:

Ըստ փաստաբան, Արայիկ Պետրոսյանին մեղադրանք առաջադրելու համար գոյություն չունի նաեւ հիմնավոր կասկած: «Խուզարկության արդյունքում Արայիկ Պետրոսյանի բնակարանից հայտնաբերվել է իր հոր որսորդական զենքը, իսկ գյուղապետի սպանությունը կատարվել է «տոզ» հրացանի միջոցով: Բացի այդ, վարույթն իրականացնող մարմինը Արայիկ Պետրոսյանին որպես վկա հարցաքննելով որևէ հարցադրում չի կատարել Հրաչ Մուրադյանի սպանության հետ նրա առնչության մասին»,- ընդգծեց է Գիվի Հովհաննիսյանը:

Վերջինիս խոսքով՝ վարույթն իրականացնող մարմինը առաջադրված մեղադրանքը հիմնավորվել է նրանով, որ իր պաշտպանյալը այդ ժամանակ վարել է «Նիվա» մեքենա, և որ մեքենայի մեջ, ինչպեւ նաեւ Արայիկ Պետրոսյանի հագուստի թևքերի և նրա դեմքի վրա հայտնաբերվել է անտիմոն:

Փաստաբանը հարց է բարձրացնում, եթե անտիմոնը լայն տարածում ունի բնության մեջ և կենցաղում, ապա ինչով են հիմնավորում, որ այդ կրակոցից է առաջացել դա:

Գ.Հովհաննիս։յանի տեղեկացմամբ, մինչ այսօր Արայիկ Պետրոսյանը հարցաքննվել է 1 անգամ, նրա հետ առերեսում և որևէ քննչական գործողություններ չեն կատարվել: «Քննիչը դատարանում հայտարարել է, որ գործի հետ կապված շուրջ 150 անձ է հարցաքննվել, եթե այդքան մարդ է հարցաքննվել, բայց Արայիկ Պետրոսյանի մեղքը չի հիմնավորվել կամ որևէ անձ չկա, որ ցուցմունք տա նրա մեղքը հիմնավորելու համար, սա նշանակում է, որ անիմաստ աշխատանք է կատարվել, և այդ անիմաստ աշխատանքով հիմնավորել գործի քննության նկատմամբ ջանասիրությունը իրավաչափ չէ: Կատարվում է պատվեր և մեկը մեկին պաս են տալիս՝ հաշվի չառնելով, որ անմեղ մարդու ճակատագիր է խեղվում»,- նշեց Փաստաբանը:

Ի դեպ, փաստաբանը ներկայացմամբ,եզրակացության մեջ նշված չէ անգամ այդ անտիմոնի վաղեմության ժամկետը։ Եթե անգամ իրենք ընդունենք, որ անտիմոնը կրակոցի հետևանքով է առաջացել, ապա ինչպես կարող են հիմնավորել, բացատրել, որ հենց այդ կրակոցի հետևանքով է առաջացել: Սրանք հարցեր են որոնք պատասխաններ չունեն,- ասաց փաստաբանը՝ հավելելով, որ «Արայիկ Պետրոսյանի և Պռոշյանի գյուղապետի հարաբերությունները բավականին լավ են եղել և որեւէ պատճառ չի եղել սպանություն կատարելու համար։ Ի վերջո թեկուզև վատ լինեին, ապա դա սպանության հանգեցնելու պատճառ չէ, սա կնշանակի որ հանրապետության մեծամասնությունը իրար պետք է սպանի»,- հավելեց փաստաբանը:

Արայիկ Պետրոսյանի կալանքը 2 ամսով երկարացնելու վերաբերյալ առաջին ատյանի դատարանի որոշման դեմ Գիվի Հովհաննիսյանը արդեն վերաքննիչ բողոք է ներկայացրել, սակայն վստահ է, որ վերաքննիչ դատարանը եւս որևէ փոփոխություն չի կատարելու:

Անդրադառնալով Արայիկ Պետրոսյանի եղբոր Արտակ Պետրոսյանին առաջադրված մեղադրանքին և նրա կալանավորմանը՝ փաստաբանը նշեց, որ փորձում են կապել այս 2 գործերը իրար: Փորձելով հիմնավորել ասածը՝ փաստաբանը նշեց, որ «վարույթն իրականացնող մարմինը նշել է, թե վեճ է եղել, ինչը վերածվել է թշնամանքի եղբայրների և գյուղապետի միջև, որն էլ հետագայում ծնել է սպանությունը: Սակայն վիճաբանությունը Հրաչ Մուրադյանի հետ չի եղել, այլ մեկ ուրիշի հետ»,- ասաց Գիվի Հովհաննիսյանն ու հավելեց, որ արհեստականորեն փորձում են տվյալ վիճաբանության մեջ ներքաշել նաև Արայիկ Պետրոսյանին, ով նույնիսկ վեճի ժամանակ այդտեղ չի էլ եղել:

Ներկայումս միջնորդություն է ներկայացվել Արտակ Պետրոսյանի կալանքը ևս 2 ամսով երկարացնելու վերաբերյալ և եթե կալանքը երկարացվի, ապա այս դեպքում ևս փաստաբանը կդիմի վերաքննիչ դատարան:

Լուսանկարը՝ shamshyan.com-ի