Փաստ ինֆո

Սյունիքի մարզի ընդհանուր իրավասության դատարանի դատավճռով՝ Իրանի Իսլամական Հանրապետության քաղաքացի Միրմոհսեն Միրղասեմի Ազադմերին ՀՀ տարածք խոշոր չափերի «ափիոնը» տեսակի թմրամիջոց տեղափոխելու համար դատապարտվեց 4,5 տարվա ազատազրկման:

Միրմոհսեն Միրղասեմի Ազադմերին Հայաստանի պետական սահմանը հատել է 2013 թվականի ապրիլի 25-ին՝ ավելի քան 6 գրամ «ափիոն» տեսակի թմրամիջոցի հետ միասին։

«Ափիոնը» Միրմոհսեն Միրղասեմի Ազադմեհրին ձեռք է բերել Հայաստան գալուց առաջ, որի մի մասը պահել է իր հագի բաճկոնի ձախ ծոցագրպանում, իսկ մյուս մասը դրել իր ճամպրուկում գտնվող վերնազգեստի գրպանում: 2013 թվականի ապրիլի 25-ին` ժամը 09:00-ի սահմաններում, Իրանից Մեղրիի անցակետով եկել է Հայաստան և մտել Մեղրիի մաքսակետի մաքսային հսկողության գոտի, որտեղ մաքսային տեսուչին չի հայտնել իր մոտ առկա թմրամիջոցի մասին և դրանք մաքսանենգությամբ` մաքսային հսկողությունից թաքցնելով, դուրս է հանել մաքսային հսկողության գոտուց։ Թմրամիջոցը հայտնաբերել են ՀՀ ԿԱ ՊԵԿ ՆՀՎ վարչության աշխատակիցները՝ զննելով նրա անձնական իրերը:

Պետական եկամուտների կոմիտեի քննչական վարչությունը Միրմոհսեն Միրղասեմի Ազադմեհրին մեղադրանք է առաջադրել ՀՀ քրեական օրենսգրքի 2 հոդվածներով՝ ՀՀ քրեական օրենսգրքի 215 հոդվածի 2-րդ մասով և ՀՀ քրեական օրենսգրքի 268 հոդվածի 2-րդ մասի 2-րդ կետով՝ մաքսանենգությամբ` մաքսային հսկողությունից թաքցնելու եղանակով ՀՀ տարածք խոշոր չափերի` 6.062 գրամ ափիոն տեսակի թմրամիջոց տեղափոխելու համար։

Ամբաստանյալը դատարանում ընդունել է առաջադրված մեղադրանքը եւ միջնորդել դատաքննությունն անցկացնել արագացված կարգով, ինչը բավարարվել է: Սյունիքի մարզի ընդհանուր իրավասության առաջին ատյանի դատարանի՝ հունիսի 5-ի դատավճռով Միրմոհսեն Միրղասեմի Ազադմերին դատապարտվել է 4,5 տարվա ազատազրկման, իսկ առգրավված թմրամիջոցը դատավճռի օրինական ուժի մեջ մտնելուց հետո կոչնչացվի։