Փաստ ինֆո

Հետախույզների գործունեությունը բացահայտող հրապարակումները ԶԼՄ-ներում անուղղելի վնաս են հասցնում ամերիկացիների անվտանգությանը, հայտարարել է ԱՄՆ Ազգային հետախուզության տնօրեն Ջեյմս Քլեպպերը:

Այսպիսի հայտարարությամբ նա հանդես է եկել այն բանից հետո, երբ «Washington Post» և «Guardian» թերթերը հրապարակել են ամերիկյան դատարանի այն գաղտնի որոշումները, որոնք վկայում են, որ ԱՄՆ հետախուզությունը մուտք ունի դեպի երկրի ամենախոշոր կապի օպերատոր «Verizon»-ի հաճախորդների հեռախոսազրույցները և համացանցային օգտատերերի փոխադարձ գրագրությունները:

Ջեյմս Քլեպպերը ընդգծել է, որ հետախույզների գործունեության գաղտնազերծման ձգտումը լրագրողների կողմից արժանի է հանդիմանանքի:

«Ամերիկյան դատարանի գաղտնի փաստաթղթերի չթույլատրված բացահայտումները կարող են անուղղելի վնաս հասցնել մեր ազգի առջև հայտնվող բազմաթիվ սպառնալիքները ժամանակին տարբերակելու և դրանց արձագանքելու ունակությանը»,- հայտարարել է ԱՄՆ-ի հետախուզության ղեկավարը:

Ընդ որում, նա նշել է, որ տեղեկատվություն հավաքելու «կարևոր և ամբողջությամբ օրինական ծրագրի» մասին հոդվածները «պարունակում են բազմաթիվ անճշտություններ», իսկ հետապնդումն իրականացվում է միայն օտարերկրյա քաղաքացիների նկատմամբ, հաղորդում է «Associated Press»-ը:

Հիշեցնենք, որ «Ամերիկացիները հատուկ ծառայությունների հսկողության ներքո» թեմայով աղմուկը բորբոքվել է այն բանից հետո, երբ ԶԼՄ-ներում ի հայտ եկավ խիստ գաղտնի «PRISM» անունը ստացած համացանցային ծրագրի մասին տեղեկատվություն, որի շրջանակներում Հետախուզությունների դաշնային բյուրոն և ԱՄՆ-ի Ազգային անվտանգության գործակալությունը ստանում են գաղտնի տեղեկություններ խոշորագույն «IT» ընկերությունների մասին: