Փաստ ինֆո

ՀԾԿՀ-ի նիստի ավարտից հետո, պատասխանելով լրագրողների հարցերին, բավական հետաքրքրական հայտարարություններ են արել ՀԾԿՀ նախագահ Ռոբերտ Նազարյանն ու «ՀայՌուսգազարդ»-ի գլխավոր տնօրեն Վարդան Հարությունյանը:

Հիշեցնենք. Մայիսի 14-ին գազի սակագնի վերանայման հայտով «ՀայՌուսգազարդ» -ը դիմել էր ՀԾԿՀ: Հաջորդ օրը Հանձնաժողովին նամակով դիմել էր նաեւ Վարչապետ Տիգրան Սարգսյանը, ինչպես տեղեկացրեց Ռոբերտ Նազարյանը, հետեւյալ բովանդակությամբ. «Սակագների հաշվարկման ժամանակ հիմք ընդունել ոչ թե 270 դոլար 1000 խ/մ սակագինը սահմանի վրա, այլ 30%-ով նվազ մեծություն»: Ընդ որում, այդ 30 տոկոսի մեխանիզմներն ու աղբյուրները, ինչպես նշված է եղել Վարչապետի գրության մեջ «այս պահին քննարկվում են ՌԴ-ի հետ»: «Ավարտին կտեղեկացվի ինչպես մեզ, այնպես էլ հանրությանը»,- նշեց Հանձնաժողովի նախագահը:

Այդուհանդերձ, Ռոբերտ Նազարյանը որոշ չափով գաղտնազերծեց սուբսիդավորման միջոցների ծագման աղբյուրը: «Սա չի լինելու մեր պետության, ՀՀ միջոցների հաշվին, ես գոնե այսպես գիտեմ, ես բանակցային կողմ չեմ, բայց ես այդպես եմ տեղեկացված»,- ասաց Ռոբերտ Նազարյանը:

Ի տարբերություն Հանձնաժողովի նախագահի, «ՀայՌուսգազարդ»-ի գլխավոր տնօրեն Վարդան Հարությունյանը հայտարարեց, թե ինքը տեղյակ է բանակցություներից, բայց մինչեւ դրանց ավարտը ոչինչ չի հրապարակի: Եվ այդուհանդերձ, հաստատեց Ռ.Նազարյանի հայտարարությունն այն մասին, որ «սուբսիդավորումը լինելու է ոչ ՀՀ բյուջեի հաշվին»:

Այնուամենայնիվ, տեղի տալով լրագրողների հարցապնդումներին, ՀԾԿՀ նախագահը ստիպված եղավ մանրամասներ եւս գաղտնազերծել. «Այս 30% սուբսիդավորումը, որը նաեւ իրականացնելու է ՌԴ-ը, նույնն է, որ գազի գինը սահմանի վրա 189 դոլար է, ինչու է այս տարբերակով ձեւակերպվում, կարծում եմ դուք մեզանից շատ լավ եք հասկանում»:

Հիշեցնենք. Մինչ թանկացումը գազի գինը սահմանի վրա 180 դոլար էր:

Փաստորեն, ստացվում է, որ Ռուսաստանը Հայաստանին մատակարարվող գազի գինը նախ թանկացնում է, հետո հենց ինքն էլ այն սուբսիդավորո՞ւմ:

Այս իրավիճակը որքան էլ, որ տարօրինակ կարող է թվալ, բայց նոր երեւույթ չէ հայաստանյան էներգետիկ համակարգում, հատկապես կապված հայ-ռուսական տնտեսական հարաբերությունների հետ:

2006թ.-ին, երբ Ռուսաստանը Հայաստանին վաճառվող գազի գինը 55 դոլարից դարձրեց 110 դոլար, Հայաստանը շուրջ 250 մլն դոլարով Ռուսաստանին վաճառեց Հրազդանի ՋԷԿ-ի 5-րդ էներգաբլոկը եւ այդ գումարից 188 մլն դոլարը հատկացրեց գազի գնի սուբսիդավորմանը:

Ստացվում է, որ գազի գինը չթանկացնելու դիմաց Ռուսաստանին ընդամենը 62 մլն դոլարով հանձնվեց մեր երկրի հիմնական էներգետիկ կառույցներից մեկը:

Արդյունքում՝ չնայած տեղի ունեցած թանկացմանը, Հայաստանի սպառողների համար գազի գինը մնաց անփոփոխ` 59 դրամ, իսկ գնի մեջ ավելացված 25 դրամը սպառողների փոխարեն երեք տարի շարունակ 2006-08 թթ-ին, սուբսիդավորվում էր Հրազդանի  ՋԷԿ-ի  5-րդ էներգաբլոկի վաճառքից ստացված գումարների հաշվին:

Թե որն է լինելու այս անգամվա սուբսիդավորման գինը, թերեւս կիմանանք հայ-ռուսական հերթական գաղտնի բանակցություների ավարտից հետո միայն:

Հեղինակ` Նելլի Դանիելյան