Փաստ ինֆո

«Ոչ ոք չի ասում, որ մրցույթ չպետք է լինի, սակայն հրապարակի վերակառուցման խնդիրը հրատապ չէ, կան այլ կառույցներ, որոնք դրա կարիքը ավելի շատ ունեն»,- Հանրապետության հրապարակի վերակառուցման նախագծին անդրադառնալով այսօր լրագրողների հետ հանդիպման ժամանակ ասաց ճարտարապետ Մկրտիչ Մինասյանը:

Վերջինս խոսքով՝ ճարտարապետների միությունը դեմ չէ մրցույթին, թող լինի, բայց անհրաժեշտ է որոշակի պայմաններ հստակեցնել, քանի որ թերություններն ու բացերը շատ են։ Ի հիմնավորումն՝ ճարտարապետն ընթերցեց մրցույթի պայմաններից մի հատված. «մրցույթի արդյունքների քննարկման ընթացքում առանձնակի ուշադրության կարժանանան այն առաջարկությունները, որոնք առավել հիմնավոր լուծումներ կառաջարկեն հրապարակի և հարող տարածքների վերակառուցման համար»: Ըստ ճարտարապետի, սա վտանգավոր ձեւակերպում է. «Տարածքների վերակառուցման ի՞նչ խնդիր կարող է լինել»,- ասաց Մ.Մինասյանն արձանագրելով, որ ոչ մի տեղ նշված չէ Հանրապետության հրապարակի ճարտարապետական հուշարձան լինելը։ Ըստ Մինասյանի այս հարցը պետք է պայմանների մեջ ամրագրվի, քանի որ հուշարձան լինելու դեպքում մոտեցումներն այլ են, հուշարձանը անձեռնմխելի է համարվում:

Ճարտարապետի կարծիքով՝ մրցույթ հայտարարելուց առաջ նախ և առաջ պետք է լավ ուսումնասիրվի, առկա սխալների վրա նորերը չգումարելու համար: «Առաջարկվում է հրապարակի տակ ստորգետնյա ավտոկայանատեղի կառուցել, այս ամենը ևս պետք է ուսումնասիրվի, քանի որ այդ տարածքի տակ կան բազմաթիվ հնագիտական շերտեր»,- ասաց ճարտարապետը:

Ինչ վերաբերում է հրապարակի կառույցների ձևափոխմանը՝ Ազգային պատկերասրահին, Արտգործնախարարության շենքին կամ Արմենիա Մարիոտ հյուրանոցին, ապա ճարտարապետը վրդովված ասաց. «Թամանյանական բոլոր շենքերը արդեն իսկ խեղաթյուրվել են, էլ ինչ պետք է արվի»: