Փաստ ինֆո

Վերաքննիչ քրեական դատարանի վարույթում է Վասիլ Շահվերդյանի գործով մեղադրանքի կողմի բերած վերաքննիչ բողոքի քննությունը: Այս մասին է գրում թերթը` հավելելով, որ գործը քննվել է Լոռու մարզի ընդհանուր իրավասության առաջին ատյանի դատարանում:

Ըստ մեղադրանքի` Ալավերդի քաղաքի բնակիչներ Գագիկ Կիլինկարովի և Աշոտ Շաքարյանի միջև դեռ տարիներ առաջ են ձևավորված եղել թշնամական հարաբերություններ: Աշոտ Շաքարյանը կրակել է Կիլինկարովի վրա, նույն օրը վերջինիս եղբայրը` Արմենը, սպանել է Աշոտ Շաքարյանի եղբորը` Արսենին:

Գագիկ Կիլինկարովն իմացել է, որ Վասիլ Շահվերդյանը Աշոտ Շաքարյանի սանիկն է և նրա նկատմամբ ևս թշնամաբար է տրամադրվել` նրան սպառնալով և հայհոյելով:

Նման վերաբերմունքից վրդովված` Վ.Շահվերդյանը որոշել է վրեժխնդիր լինել Կիլինկարովից:

Արդյունքում` 2012թ. հունվարի 12-ին Վ.Շահվերդյանը փողոցում 3-4 մետր հեռավորությունից 7 կրակոց է արձակել Գ.Կիլինկարովի ուղղությամբ: Վերջինս մարմնի տարբեր հատվածներում ստացած 6 հրազենային վնասվածքներից տեղում մահացել է:

Իսկ Կիլինկարովի ընկերը` Ա.Կոստանդյանը, ով այդ պահին ներկա է եղել, ստացել է միջին ծանրության հրազենային վնասվածք:

Ընդհանուր իրավասության դատարանը եկել է այն եզրակացության, որ Վ.Շահվերդյանը դիտավորյալ սպանություն է կատարել, այլ ոչ թե` սպանություն` շատերի կյանքի համար վտանգավոր եղանակով: Դատարանը վերաորակել է Շահվերդյանի արարքը, նրան մեղավոր ճանաչել ՀՀ քրեական օրենսգրքի 104-րդ և 131-րդ հոդվածների 1-ին մասերով և դատապարտել ազատազրկման 10 տարի ժամկետով:

Մեղադրողը վերաքննիչ բողոքում պնդել է, որ Շահվերդյանը Կիլինկարովի դիտավորյալ սպանությունը կատարել է շատերի կյանքի համար վտանգավոր եղանակով, իսկ

Կոստանդյանի առողջությանը վնաս է հասցրել անզգուշությամբ:

Ըստ մեղադրողի` Շահվերդյանը պետք է դատապարտվի 15 տարվա ազատազրկման:

Հոդվածն ամբողջությամբ կարդացեք «Ժամանակ» օրաթերթի` 05.06.2013թ. համարում: