Փաստ ինֆո

Մինսկում ընթացող բռնցքամարտի Եվրոպայի առաջնությունում Հովհաննես Դանիելյանին հաղթած ռուսաստանցի Դավիթ Հայրապետյանի մարզիչ Վալերի Էնտալցևը մեկնաբանել է սանի ելույթը:

«Այս մենամարտից առաջ անհանգիստ էի, քանզի լոնդոնյան օլիմպիադայից հետո Դավիթը առաջին անգամ էր ռինգ դուրս գալու: Դրան գումարվում էր հոգեբանական ևս մեկ գործոն. նա մեր թիմի ավագն է, ուստի մեկնարկային անհաջողությունը կարող էր բացասաբար անդրադառնալ մյուս մարզիկների հոգեվիճակին: Նման տխուր փորձ ունեցել ենք 2010 թվականի Եվրոպայի առաջնության ժամանակ: Ճիշտ է, այդ տարի մրցավարներն էլ շատ օգնեցին ադրբեջանցի մարզիկին, բայց դրանից հարցի էությունը չի փոխվում: Այս անգամ որոշել էինք մրցափորձի պակասը փոխհատուցել ֆիզիկական հրաշալի պատրաստականությամբ: Հատուկ այդ նպատակով ուսումնամարզական հավաք ենք անցկացրել Ծաղկաձորում: Ունենալով այդպիսի հուսալի հիմք՝ որոշեցինք առաջին իսկ ռաունդից արագ տեմպ հաղորդել մրցակցությանը, բայց ոչ թե մրցակցին ճնշելու (Դանիելյանի կարգի փորձառու մարզիկին ճնշելն այդքան էլ հեշտ չէ), այլ հաշվի մեջ առաջ անցնելով՝ հոգեբանական որոշակի առավելություն ստանալու համար: Երկար ձեռքեր ունեցող Դանիելյանի արագությունը որոշված էր թուլացնել նրան հեռու տարածությունից մենամարտելու հնարավորությունից զրկելու և հարվածաշարեր հասցնելու միջոցով: Անշուշտ, եղան նաև թերություններ. որոշ դրվագներում Դավիթը չափազանց երկար էր մնում հարվածային գոտում, բայց ընդհանուր առմամբ գոհ եմ»,- ասել է Էնտալցևը Весь спорт գործակալությանը:

Մարզիչը նշել է, որ հասցրել է ուսումնասիրել Հայրապետյանի հաջորդ մրցակցին՝ իտալացի Մանուել Կապայիին, որի մոտ առավելություններից բացի նաև բազում թերություններ է նկատել: «Լավ պաշտպանվելու և ուշադիր աշխատելու դեպքում Դավիթը կիսաեզրափակիչ հասնելու հնարավորություն կունենա»,- նշել է փորձառու մասնագետը: