Փաստ ինֆո

Հայտարարված ընդմիջումից հետո ՀԾԿՀ-ի նիստը վերսկսվեց արդեն այդ կառույցի նախագահ Ռոբերտ Նազարյանի նախագահությամբ: Հանձնաժողովի որոշում, որպես այդպիսին, չկայացվեց, ըստ էության Ռոբերտ Նազարյանն անձամբ դուրս եկավ հանրային կառույցների ներկայացուցիչների դժգոհությունները լսելու եւ դրանց պատասխանելու:

«Մենք դահլիճային պայմաններում նման քննարկում չենք կազմակերպի, որովհետեւ դահլիճը միտինգների համար է, հանրահավաքների համար է, ժողովների համար է, հանրագումարների համար է, բայց ոչ նման կարգի քննարկումների»,- ասաց Ռ.Նազարյանը, առաջարկելով տեղափոխվել Հանձնաժողովի երկրորդ` ավելի մեծ դահլիճը:

Ի դեպ, Հանձնաժողովի նախագահը նաեւ հավելեց, որ այդ քննարկումներին ԶԼՄ ներկայացոիցչները չեն մասնակցի, որ ավելորդ տեղ չզբաղեցնեն:

Հասարակական կառույցների ներկայացուցիչների դիտարկմանը, թե ինչպես կարելի է հանրային քննարկման դռները փակել մամուլի ներկայացուցիչների առաջ, Ռ.Նազարյանը հայտարարեց. «Դուք շոուի կողմնակից եք, ես` ոչ»:

Հանձնաժողովի այլ դահլիճ տեղափոխվելու մասին առաջարկին, Հանրային խորհրդի ներկայացուցիչ Արշակ Սադոյանն այսպես արձագանքեց. «Եթե դուք ավելի մեծ դահլիճ ունեիք, ինչո՞ւ միանգամից այնտեղ չկազմակերպեցիք քննարկումը, դիտմա՞մբ եք անում, որ լսումները չկայանան»: Արշակ Սադոյանի հարցը, սակայն, մնաց ապատասխան, փոխարենը ՀԾԿՀ-ի նախագահը վրդովված հայտարարեց, թե քննարկման անցկացման հետագա կարգի եւ տեղի մասին տեղեկատվությունը կտեղադրվի Հանձնաժողովի պաշտոնական կայքում:

Նիստն այսքանով ավարտվեց, իսկ գազի եւ էլեկտրաէներգիայի նոր սակագների ձեւավորման շուրջ երկար սպասված հանրային քննարկումներն այդպես էլ չկայացան: