Փաստ ինֆո

ՄՕԿ-ը դասակարգել է օլիմպիական մարզաձևերը ըստ գրավչության աստիճանի, որի հիման վրա էլ միջազգային ֆեդերացիաները կֆինանսավորվեն օլիմպիական խաղերի ծրագրում ընդգրկված լինելու համար: Հատկանշական է, որ ֆուտբոլը դասվել է միայն 2-րդ, իսկ ըմբշամարտը՝ նախավերջին խմբում:

Կազմակերպության նախագահ Ժակ Ռոգեն հայտարարել է, որ վերամշակված մեթոդոլոգիայի համաձայն նախկին 4 խմբի փոխարեն ձևավորվել է 5-ը: Ըստ այդմ էլ Ամառային օլիմպիական մարզաձևերի միջազգային ֆեդերացիաների ասոցիացիան կբաշխի պարգևավճարները, որի ընդհանուր գումարը, հիշեցնենք, «Լոնդոն-2012»-ի արդյունքներով կազմել է շուրջ 520 մլն դոլար:

Ահավասիկ ՄՕԿ-ի դասակարգման սանդղակը.

A կարգ. Ջրային մարզաձևեր, թեթև ատլետիկա, մարմնամարզություն:
B կարգ. Բասկետբոլ, հեծանվային սպորտ, ֆուտբոլ, թենիս, վոլեյբոլ:
C կարգ. Նետաձգություն, բադմինթոն, բռնցքամարտ, ձյուդո, ակադեմիական թիավարություն, հրաձգություն, սեղանի թենիս, ծանրամարտ:
D կարգ. Բայդարկաներով և կանոէյով թիավարություն/արագընթաց թիավարություն, ձիասպորտ, սուսերամարտ, հանդբոլ, մականախաղ, առագաստանավային սպորտ, թաեքվոնդո, տրիատլոն, ըմբշամարտ:
E կարգ. Ժամանակակից հնգամարտ, գոլֆ, ռեգբի-7:

Ամառային օլիմպիական մարզաձևերի միջազգային ֆեդերացիաների ասոցիացիայի գործադիր տնօրեն Էնդրյու Ռայանը նշել է, որ մարզաշխարհը վաղուց էր սպասում դասակարգման վերամշակված տարբերակին: Մեթոդոլոգիան կառուցված է 18 չափանիշների հիմման վրա, որոնցից առաջնայինն է հեռուստալսարանը, որը տվյալ մարզաձևը ապահովում է ամբողջ աշխարհում: Այնուհետև, հաշվի է առնվում օլիմպիական խաղերի ժամանակ վաճառված տոմսերի քանակը: Կարևորվում են նաև չափանիշները, որոնցով կարելի է որոշել համաշխարհային հանրության հրապարակային վերաբերմունքը տվյալ մարզաձևին: Անպայման հաշվի է առնվում նաև պատմական բաղադրիչը ու տվյալ միջազգային ֆեդերացիայի նյութական ներդրումը օլիմպիական խաղերում: