Փաստ ինֆո

Երեւանի քաղաքապետարանը դարձյալ որոշել է Հանրապետության Հրապարակում, նախկին Լենինի արձանի տեղում նոր արձան տեղադրել:

Թե որ արվեստագետի եւ որ աշխատանքին կհասնի այդ պատվավոր տեղը, պարզ կդառնա միայն օգոստոսի 29-ից հետո, երբ կավարտվի հայտարարված բաց մրցույթին առաջարկների ներկայացման ժամկետը եւ քաղաքապետարանը կամփոփի դրա արդյունքները:

Հիշեցնենք. Լենինի պղնձաձույլ արձանը Երեւանի գլխավոր հրապարակում տեղադրվել էր 1940թ.-ին` Խորհրդային Հայաստանի 20-ամյակի օրը: Արձանի հանելու որոշումը կայացվեց տեղադրումից 51 տարի անց` 1991թ-ին` Հայաստանի անկախացումից հետո:

Հինգ տարի դատարկ մնալուց հետո էլ Կառավարության որոշմամբ քանդվեց նաեւ արձանի պատվանդանը: Հետո արդեն սկսվեցին քննարկումները, թե ում կամ ինչի արձանը կարող է զբաղեցնել Լենինի արձանի պատվավոր տեղը:

2004թ.-ին նույնիսկ մրցույթ հայտարարվեց, բայց հաղթողներ չեղան: Առաջարկներն ամենաբազմազան էին. Մեսրոպ Մաշտոց, Գրիգոր Լուսավորիչ, Քրիստոս, Տիգրան Մեծ, Անդրանիկ, անգամ առաջարկ եղավ Հանրապետության Հրապարակ տեղափոխել կայարանամերձ հրապարակում տեղադրված Երվանդ Քոչարի հեղինակած Սասունցի Դավթի արձանը:

Իսկ վերջին այսօրինակ առաջարկն էլ բոլորովին վերջերս հնչեց PR զարգացման հայկական կենտրոնի կողմից: Առաջարկվում էր Հանրապետության Հրապարակում տեղադրել ազգերի տոհմածառ:

Թերեւս առաջարկությունների պակաս հերթական հայտարարված մրցույթում եւս չի լինի, մնում է, որ ընտրվի այն տարբերակը, որին հավանություն կտա նաեւ հասարակությունը:

Ի դեպ մրցութային հանձնաժողովի նախագահն է Երեւանի գլխավոր ճարտարապետ Նարեկ Սարգսյանը, հանձնաժողովի կազմում են Մշակույթի եւ Քաղաքաշինության փոխնախարարները, հանրապետության ճանաչված ճարտրապետներ, որոնց թվում` Մկրտիչ Մինասյանը, Գուրգեն Մուշեղյանը, Սաշուր Քալաշյանը, Յուրի Սաֆարյանը, Արթուր Մեսչյանը եւ Հրաչ Պողոսյանը:

Մրցույթի նախաձեռնողները որոշել են առաջին երեք լավագույն աշխատանքների հեղինակներին պարգեւտրել 1-ական մլն դրամով, իսկ մրցութային հանձնաժողովի որոշմամբ ուշադրության արժանացած ևս երեք աշխատանքների հիղինակները կստանան խրախուսական մրցանակներ` յուրաքանչյուրը 500 000 դրամ: