Փաստ ինֆո

Սպիտակ տունը և ամերիկյան օրենսդիրները հիմնախնդիրը լուծելու մի քանի աղմկահարույց դեպքերից հետո սկսել են երկրի զինված ուժերում սեռական բռնությունների նկատմամբ զանգվածային պայքարի գործընթաց: Այդ երևույթը հեղինակազրկում է նաև բանակային հրամանատարական կազմին, քանի որ երևույթը ցույց է տալիս հրամանատարության անկարողությունը այդ հիմնախնդրի լուծման հարցում:

Հինգշաբթի օրը Դեմոկրատական և Հանրապետական կուսակցություններից մի խումբ օրենսդիրներ ներկայացրել են օրենքի մի նախագիծ, որի համաձայն այդպիսի հանցագործությունների հետապնդումները պետք է իրականացնեն ոչ թե զինվորական վերադաս մարմինները, այլ հատուկ զինվորական դատախազությունը:

Մինչ այդ, նախագահ Բարաք Օբաման Պաշտպանության նախարար Չակ Հեյգլի և զինվորական հրամանատարության այլ ներկայացուցիչների մասնակցությամբ հրավիրել է խորհրդակցություն: Ինչպես հայտնել է Սպիտակ տան պաշտոնական ներկայացուցիչը, այդ հանդիպմանը, բացի նախարարից ներկա կլինեն Շտաբների միացյալ կոմիտեի ղեկավարը և նախագահի նախկին զինվորական խորհրդատու, գեներալ Մարտին Դեմփսին:

«Զինված ուժերում սեռական բռնության ալիքին պետք է վերջ տրվի»,- հայտարարել է հանրապետական սենատոր Սյուզան Քոլինզը: Դեմոկրատ սենատոր Քիրսթեն Ջիլլիբրանդը, ով Կոնգրեսում պետք է պաշտոնապես ներկայացնի օրենքի նախագիծը, նշել է, որ այդ քայլի նպատակը զինված ուժերում վարքի դրսևորման մշակույթը փոխելն է:

Վերջին ժամանակներում Պենտագոնը ենթարկվում էր ավելի ու ավելի մեծ ճնշումների՝ կապված բանակում աղմուկ հանած բռնաբարությունների և սեռական հետապնդումների բազմաթիվ դեպքերի հետ: Անցյալ շաբաթ հրապարակված տարեկան հաշվետվության համաձայն, զինվորականների կողմից սեռական բնույթի հարձակումների թիվը 2012թ.-ին աճել է 37 տոկոսով՝ հասնելով 26.000 դեպքի:

Հաշվետվության հրապարակման նախօրեին հայտնի դարձավ, որ այն սպան, ով պատասխանատու էր օդային ուժերում սեռական բնույթի հանցագործությունները կանխարգելելու համար, մեղադրվել է Պենտագոնից ոչ հեռու, ավտոկայանատեղիում մի կնոջ հետապնդելու մեջ: Սպան այդ պահին եղել է ոչ սթափ վիճակում:

Իսկ երեքշաբթի էլ պարզ է դարձել, որ մեկ այլ սպա, ով նույնպես համանման պաշտոն էր զբաղեցնում Տեխասի Ֆորդ-Հուդ բազայում, նույնպես մեղադրվել է սեռական բնույթի և մարմնավաճառության հետ կապված հանցագործությունների մեջ:

Հեյգելը կարգադրել է կրկին անցկացնել սեռական բնույթի հանցագործությունների դեմ պայքարելու կոչված և պատասխանատվություն կրող զինվորականության ուսուցում և որակավորման ստուգումներ: Միաժամանակ Պենտագոնը հասկացնել է տվել, որ Հեյգելը պատրաստ է այդ ուղղությամբ նաև իրականացնել հետագա քայլեր:

Դեմոկրատ սենատորներ Քլեր ՄաքՔասքլին և Էմի Քլոբուչարը ներկայացրել են օրենքի նախագիծ, որով Հեյգելին կոչ են անում ակտիվացնել սեռական բռնությունների դեմ պայքարի և այդ ոլորտում զինվորական մասնագետների վերաորակավորման ծրագրերը:

Անցյալ շաբաթ Հեյգելը հանրության առաջ հանդես եկավ այդպիսի հանցագործությունների հետապնդումները զինվորական հրամանատարության իրավասություններից հանելու դեմ, սակայն դրանից հետո Պենտագոնի ներկայացուցիչները ընդգծեցին, որ նախարարը պատրաստ է ցույց տալ ճկունություն այդ հարցը Կոնգրեսի ներկայացուցիչների հետ քննարկելու ժամանակ: