Փաստ ինֆո

Ֆուտբոլի նվիրյալ երկրպագուները, թերեւս, շարունակում են քննարկել անցած գիշեր Լոնդոնում տեղի ունեցած Չեմպիոնների լիգայի եզրափակիչ խաղի մանրամասները:

Դրամատիկ հանգուցալուծմամբ այդ հանդիպման իրադարձությունները ծավալվեցին միլիոնավոր մարզասերների աչքի առաջ, ուստի, շրջանցելով մանրամասները՝ հիշեցնենք, որ Մյունխենի «Բավարիան» 2:1 հաշվով հաղթելով Դորտմունդի «Բորուսիային»՝ իր պատմության մեջ 5-րդ անգամ նվաճեց պատվավոր մրցանակը՝ այդ ցուցանիշով հավասարվելով անգլիական «Լիվերպուլին»:

Իսկ ի՞նչ էին մտածում եզրափակիչից հետո օրվա հերոսները, որոնց շարքին արժանի խաղի համար անվերապահորեն կարելի է դասել նաեւ դորտմունդցիներին:

«Բավարիայի» ղեկից հեռացող Յուպ Հայնկեսը պատմության մեջ 4-րդ մարզիչն է, որը չեմպիոնների գավաթը նվաճել է երկու տարբեր ակումբների հետ: 1998 թվականին նա փառքի էր հասցրել Մադրիդի «Ռեալին»: Եվ, ահա, երեկվա եզրափակիչից հետո նա, ով կրկնել է Էրնստ Հապելի, Օտմար Հիտցֆելդի եւ Ժոզե Մաուրինիույի նվաճումը, հայտարարել է. «Մենք ոչ այնքան լավ ներգրավվեցինք պայքարի մեջ, ուստի, ընդմիջմանը ստիպված էի որոշ շտկումներ կատարել: Անշուշտ, երկու թիմերն էլ հակված էին պատասխանատվության ճնշմանը, որն ավելի մեծ էր իմ ֆուտբոլիստների վրա, քանզի մեզ ֆավորիտ էին համարում: Դա հատկապես խանգարում էր մեկնարկային 20 րոպեներին: Լավ է, որ ամեն ինչ հաջող ավարտվեց»:

«Բորուսիայի» գլխավոր մարզիչ Յուրգեն Կլոպը, բնականաբար, չէր թաքցնում հիասթափությունը. «Շնորհավորում եմ մրցակցին եւ գործընկերոջս, բայց չարժե նախանձել նրանց հաջողությանը: Ամեն ինչ ճիշտ արեցինք, միայն թե հանդիպման վերջնամասում հանգամանքները դասավորվեցին «Բավարիայի» օգտին: Խաղից հետո իմ տղաներին հայտարարեցի, որ դեռ անպայման կվերադառնանք եզրափակիչ: Ես վստահ եմ դրանում»: