Փաստ ինֆո

Անցյալ տարվա փաստաբանների գործադուլից ի վեր ոչինչ չի փոխվել ՀՀ վճռաբեկ դատարանի գործելաոճում, վերին դատական ատյանը շարունակում է կամայականորեն վարույթ ընդունել կամ մերժել վճռաբեկ բողոքների վարույթ ընդունելը: Այս մասին այսօրվա ասուլիսում նշեց փաստաբանների այս տարվա գործադուլի նախաձեռնող խմբի անդամ, փաստաբան Հայկ Ալումյանը: Նա հիշեցրեց, որ վերադարձվում են բողոքների 95 տոկոսը: Հայկ Ալումյանի փաստաբանական պրակտիկայում եղել է դեպք, երբ առաջին ատյանի դատարանը մերժել է քննիչի միջնորդությունը իր պաշտպանյալին կալանավորելու մասին, վերաքննիչ դատարանը բավարարել է իր միջնորդությունը, իսկ Վճռաբեկ դատարանը չի ընդունել բողոքը, այսինքն՝ քաղաքացին զրկվել է անգամ մեկ դատական ատյան իր նկատմամբ որոշումը բողոքարկելու իրավունքից:

Նույն խնդիրն առաջանում է վարչական վարույթում, վարչական դատարանը որոշում է կայացնում հօգուտ, իսկ վերաքննիչ վարչականը՝ ի վնաս քաղաքացու, իսկ վճռաբեկ դատարանը չի ընդունում քաղաքացու բողոքը: Հ.Ալումյանը հերքեց մտայնությունը, թե չեն ընդունվում անլուրջ գործերով բողոքները՝ ցանկացած քաղաքացու համար իր գործն ամենալուրջն է, մասնավորապես, անձին 2 ամսով կալանավորելու որոշումն ամենալուրջ գործն է: Այդ «անլուրջ» գործերը, հավաստիացրեց Հ.Ալումյանը, գնում են Մարդու իրավունքների եվրոպական դատարան, որտեղ կայացվում են վճիռներ Հայաստանի դեմ:

Փաստաբան Նարինե Ռշտունին նույնպես ընդգծեց, որ բողոքներն ընդունելու-չընդունելու հարցում չկա իրավական որոշակիություն, ինչը պետք է պարտադիր լինի: Անկախ նրանից, թե 5, թե 50 փաստաբան կմիանա գործադուլին, «մենք մեր ձայնը կբարձրացնենք և հույս ունենք, որ մեր ձայնն այս պետությունում կլսեն»:

Փաստաբան Գևորգ Դավթյանն ընդգծեց, որ խնդիրը օրենքի մեջ չէ, այլ գործող օրենքի սխալ կիրառման մեջ՝ եղել են դեպքեր, երբ ստորադաս դատարաններն իրար հակասող որոշումներ են ընդունել, իսկ վճռաբեկ դատարանը չի ընդունել բողոքները՝ օրենքի ոչ միատեսակ կիրառման պարագայում անգամ: Ըստ փաստաբանի, Վճռաբեկ դատարանը չի պատճառաբանում բողոքները վերադարձնելու որոշումները, պարզապես այլ գործերից «քոփիփաստ» է անում: Նման սուբյեկտիվ մոտեցման ներքո կարող է թաքնվել կոռուպցիա, ծանոթ, հարազատ, բարեկամ կապեր: Փաստաբանն ընդգծեց, որ եթե գործադուլի արդյունքում ոչինչ չփոխվի, իրենք կդիմեն ավելի երկարատև՝ 2-3 օրյա գործադուլների՝ նաև իրենց վստահորդների մասնակցությամբ:

Փաստաբան Արա Զաքարյանն իր հերթին ընդգծեց, որ խնդիրը Վճռաբեկ դատարանի մտածելակերպի ու մոտեցման մեջ է, իսկ Հայկ Ալումյանը հավելեց. «18 տարի կողմ եմ օրենսդրական փոփոխություններին, սակայն իմ վստահորդի իրավունքը հենց այսօր պետք է պաշտպանենք»:

Գործադուլին միացել է մոտ 50 փաստաբան, նախօրեին նախաձեռնող խումբը տարածել է իր հայտարարությունը, որում փաստաբաններին կոչ է արվում միանալ գործադուլին: