Փաստ ինֆո

Թերթը գրում է, որ «Ժողովրդի» խմբագրություն է այցելել Սարգիս Այվազյանը, ով նախկինում աշխատել է «Վարդաշեն» ՔԿՀ-ում և շուրջ մեկ տարի է պայքարում է` աշխատանքը վերականգնելու համար: Ս.Այվազյանը թերթի աշխատակիցներին է հանձնել 10 տարվա անբասիր ծառայության համար ստացած կրծքանշանը` խնդրելով այն փոխանցել ՀՀ արդարադատության նախարարին:
Իսկ ո՞րն է աշխատանքը կորցնելու պատճառը:

Ըստ Այվազյանի` թերթին հաղորդած տվյալների` 2001-2012թթ. ընկած ժամանակահատվածում նա աշխատել է «Վարդաշեն» ՔԿՀ-ում: Սակայն աշխատավարձի ցածր լինելու պատճառով ստիպված տաքսի է քշել, ինչը դուր չի եկել նրա` պաշտոնյա աներոջը:

Նրանց միջև լարվածությունն աստիճանաբար աճել է և որոշ ժամանակ Ս.Այվազյանը չի ներկայացել աշխատանքի, քանի որ, ինչպես ներկայացնում է Այվազյանը, աներոջ գործողությունների արդյունքում ինքը փախուստի մեջ է եղել:

Այվազյանի պատմելով` աները զանգահարել է ՔԿՀ-ի պետ Համլետ Խլղաթյանին և ասել, որ իրեն կարգի հրավիրի: Ղեկավարությունն էլ, հիմք ընդունելով նրա` աշխատանքից բացակայելը, նրան աշխատանքից հեռացրել է:

Ինչպես ներկայացնում է Ս.Այվազյան, Համլետ Խլղաթյանը նրան պարտադրել է աշխատանքից ազատվելու վերաբերյալ զեկուցագիր գրել` արգելելով մտնել հիմնարկ:

Թղթակիցը զրուցել է Արդարադատության նախարարության աշխատակազմի օրինականության վերահսկողության պետ Նորայր Փանոսյանի հետ, ով նշել է, որ եթե Ս.Այվազյանը դիմում է գրել և ազատվել աշխատանքից ու հետո էլ ասում է, որ ստիպել են, ապա թող դիմի դատարան և հիմնավորի իր ասածը:

Թղթակիցը զրուցել է նաև «Վարդաշեն» ՔԿՀ-ի պետ Համլետ Խլղաթյանի հետ, ով, լսելով Ս.Այվազյանի պատմությունը, ծիծաղել է և ասել. «Ինքն ազնիվ մարդ չէ: Հաճախակի բացակայել է: Ինքը պարտաճանաչ չէր աշխատում: Իսկ եթե շատ է ուզում աշխատել, թող գնա ուրիշ տեղ աշխատի: Աներն այստեղ կապ չունի: Ափսոս, որ նրան չեմ դատել ու դա արել եմ աներոջ խաթեր, ընտանիքի խաթեր: Մեղքս եկավ ասացի` գրի, որ ազատվում ես, թե չէ դու այստեղ պիտանի չես: Իրան մի հավատացեք: Մենք այնպես չենք աշխատում, որ բռնենք «նիզաշտո» մարդկանց գործից հանենք»: