Փաստ ինֆո

Ռուսական կողմի հետ Հայաստան մատակարարվող գազի նոր սակագնի մասին պայմանագիրը կնքվել է առնվազն մինչև ապրիլի 1-ը: Այդ տեղեկատվությունը հանրությունից իշխանությունները միտումնավոր թաքցրել են, քանի որ Հայաստանում նախընտրական շրջան էր: Մայիսի 24-ի ճեպազրույցում նման համոզմունք հայտնեց Ազգային ժողովի «Հայ ազգային կոնգրես» խմբակցության ղեկավար Լևոն Զուրաբյանը:

Որպես հիմնավորում նա նշեց, որ նախօրեին Ազգային ժողովում գազի գնի թանկացման վերաբերյալ քննարկումների ժամանակ ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը հայտնել է «սենսացիոն տեղեկություն», թե հանձնաժողովը մայիսի 13-ին ստացել է գազի գնի բարձրացման վերաբերյալ հայտը, որին կցված նոր պայմանագրի համաձայն՝ այն ուժի մեջ է մտնում ապրիլի 1-ից:

Ընդդիմադիր պատգամավորը չբացառեց, որ նոր սակագնի մասին իշխանություններին հայտնի էր ավելի վաղ՝ ՀՀ նախագահի ընտրություններից առաջ, և նրանք «մանիպուլյացիա են արել», որի միջոցով «կեղծել են նախագահական և Երևանի ավագանու ընտրությունները, ինչի համար պետք է պատասխան տան:

Լ.Զուրաբյանը, մասնավորապես, հիշեցրեց, որ նախորդ տարվա հոկտեմբերի 24-ին կառավարությունը մտադիր էր 63 մլրդ դրամով վաճառել «ՀայՌուսգազարդ» ՓԲԸ-ում իր 20 տոկոս բաժնեմասը, որպեսզի մինչև ապրիլի մեկը կարողանա պահպանել գործող գինը, սակայն ՀԱԿ-ի բարձրացրած աղմուկից հետո այդ որոշումը վերանայվեց: Ըստ նրա, «շատ լուրջ հիմքեր» կան հայտարարելու, որ գազի գնի բարձրացման վերաբերյալ գործարքը դեռևս հոկտեմբերի 24-ին «արդեն կնքված էր, առնվազն կար պայմանավորվածություն ռուսական կողմի հետ»: