Փաստ ինֆո

Թղթակիցը զրուցել է Երևանի ոստիկանապետ Ա.Կարապետյանի հետ, ով նշել է, որ Երևան քաղաքում, ընդհանուր առմամբ, վերջին շրջանում մի փոքր նվազել է առանձնապես ծանր հանցագործությունների թվաքանակը:

Ըստ նրա` նվազել է նաև անչափահասների կողմից կատարվող հանցագործությունների քանակը, քանի որ հանցագործության այս, ինչպես նաև` հնչեղություն ունեցող հանցագործությունների հսկողությունը ՀՀ ոստիկանապետի անմիջական հսկողության ներքո են:

Այնուհետև թղթակիցն անդրադարձել է օրեր առաջ Աջափնյակ համայնքում դաժանաբար սպանված մատուցողուհու դեպքին:

«Որպես առանձնակի դաժանությամբ սպանություն, այս դեպքն արտառոց էր: Աղջիկը շատերի հետ էր առնչություն ունեցել, դրա համար սպանության բացահայտումը լայնածավալ աշխատանք էր պահանջում»,- ասել է Երևանի ոստիկանապետը:

Իսկ լրագրողի այն հարցին, որ հանրության շրջանում կարծիք է ձևավորվել, թե սպանությունը կարճ ժամանակում բացահայտվեց, քանի որ այստեղ չէին բախվում օլիգարխի կամ որևէ այլ բարձրաստիճան պաշտոնյայի շահերը, Երևանի ոստիկանապետը պատասխանել է. «Կցանկանայի, որ հանրությունը գիտակցեր, որ ոստիկանությունն անաչառ է գործում, բացարձակապես տարբերություն չենք դնում մարդկանց նյութականի, ապրելակերպի միջև, ոստիկանության համար բոլոր քաղաքացիները հավասար են:

Մենք պարտավոր ենք քաղաքացիների շահերը պաշտպանել` անկախ նրանից` մարդն ինձ անձնական վիրավորանք հասցրե՞լ է, թե հարգել»:

Թղթակիցն անդրադարձել է նաև Ա.Կարապետյանի անվան շուրջ վերջին շրջանում պտտվող խոսակցություններին ևս, որի առթիվ ոստիկանապետ Ա.Կարապետյանն ասել է. «Իմ անձի շուրջ շրջանառվող խոսակցությունները զուտ հերյուրանքներ են եղել, ինչը, կարծում եմ, ժամանակի հետ հասկանալի դարձավ բոլորին: Այս զրպարտությունները տարածողները այն չար ուժերն են, ովքեր կապ ունեն կրիմինալի հետ, ովքեր փորձում են հանցագործություններ կատարել, բայց վախի ազդեցություն ունեն»: