Փաստ ինֆո

«Արմավիրում վիճակն աղետալի է, աննախադեպ կարկուտ է տեղացել, որի հետեւանքները բազմաթիվ տնտեսությունների համար ցավալի են»,- այսօր կառավարության նիստի մեկնարկին, ներկայացնելով երեկ երեկոյան իր` Արմավիր կատարած այցի արդյունքներն, ասել է վարչապետ Տիգրան Սարգսյանը:

Վարչապետը նաեւ տեղեկացրել է, որ գյուղացիների հետ հանդիպման արդյունքում որոշել է 100 տոկոսով հողի ու ջրի հարկերից ազատել կարկուտից ամբողջապես տուժած գյուղացիներին, իսկ մասնակի տուժածներին ` 50 տոկոսով:

Այսպիսով, 22 համայնքներում հողի եւ ջրի հարկն ամբողջությամբ կհատուցվի, մնացած 24 համայնքներում, որտեղ կորուստները 20-50% են, կկազմվեն ցուցակներ:

«Ցուցակները մեզ ներկայացնելու են իրենք, եւ դա լինելու է հրապարակային, որպեսզի այդ համայնքներում ժողովուրդը տեսնի, որ ովքեր տուժել են, նրանք էլ ստանում են այդ օգնությունը, որովհետեւ համայնքներում կան սեփականատերեր, որոնք չեն մշակում իրենց հողերը, կամ գտնվում են արտերկրում, նրանք հարկերից բնականաբար չեն ազատվելու»,- ասել է վարչապետը:

Ջրի հարկից գյուղացիներին ազատելը կառավարությանը կարժենա 530 մլն դրամ: Այստեղ եւս փոխհատուցումը կլինի կրած վնասներին համապատասխան:

Առեւտրային բանկերի տոկոսադրույքներին ու պայմանների վերանայման հարցում կառավարությունը կցուցաբերվի անհատական մոտեցում, քանի որ վարկերը վերցվել են տարբեր պայմաններով: ինչպես նախապես հայտարարվել էր դոլարային վարկերը կփոխարկենք դրամայինի: Միջոցները տրամադրելու է ԿԲ-ը: Իսկ Աշխատանքի եւ սոցիալական հարցերի նախարարությունը սոցիալական օժանդակություն կհատկացնի այն ընտանիքներին, որոնց ֆինանսական վիճակը աղետալի կարկտից հետո կտրուկ վատացել է:

Ի դեպ, վարչապետը նաեւ տեղեկացրել է, որ Արմավիրի մարզից ընտրված Աժ պատգամավորների նախաձեռնությամբ տուժած գյուղացիներին աջակցելու նպատակով հիմնադրամ է բացվել, որին փոխանցումներ կանեն բոլոր ցանկացողները, այդ թվում կնաեւ կառավարությունը:

Ի դեպ, կառավարությունն արդեն հստակեցրել է նաեւ օժանդակության չափերն ու ժամկետները: Այդ որոշման համաձայն, օրինակ, խաղողի այգիների տերերին օժանդակությունը կլինի 3 տարվա, պտղատու այգիներինը՝ 1-2 տարվա, իսկ բանջարաբոստանային կուլտուրաների դեպքում ավելի կարճաժամկետ աջակցություն է նախատեսվում քանի որ այդ մշակաբույսերը ավելի արագ են վերականգնվում:

Ինչ վերաբերում է Գյուղատնտեսության ապահովագրությանը, այն, ըստ վարչապետի, առայժմ Հայաստանում նպատակահարմար չէ կիրառել: Նման եզրակացության կառավարության ղեկավարը եկել է նախօրեին համայնքների ղեկավարների ու գյուղացիների հետ քննարկումներից հետո: Ապահովագրության դեպքում գյուղացիները պարտավորություն պետք է ստանձնեն ամեն ամիս կատարել վճարներ, իսկ նման ֆինանսական հնարավորություն չունեն: