Փաստ ինֆո

Նոր կառավարության գործունեության ծրագրում ատոմակայանի նոր էներգաբլոկի կառուցման վերաբերյալ կետ չկա, ինչը մեկնաբանության առիթ է տվել, թե կառավարութունը հրաժարվել է այդ ծրագրից: Այս քննարկումների ֆոնին բավական հետաքրքրական նախագիծ է ներառվել կառավարության մայիսի 23-ի նիստի օրակարգում:

Այսպես 2013 թվականի մայիսի 31-ին, Մինսկում նախանշված է ԱՊՀ երկրների միջեւ «խաղաղ նպատակներով ատոմային էներգիայի օգտագործման բնագավառում միջպետական հարաբերությունների համակարգման մասին» համաձայնագրի ստորագրություն: Բուն համաձայնագիրը նոր ատոմակայանի կառուցման մասին չի հիշատակում, դրանում ԱՊՀ երկրները հավաստում են իրենց պատրաստակամությունը միջուկային վթարների կանխարգելման, արտակարգ իրավիճակներում փոխօգնության կազմակերպման, բարձր որակավորում ունեցող մասնագետների փոխանակման եւ վերապատրաստման, ինչպես նաեւ անվտագության նորմերի համատեղ մշակման բնագավառում:

Այդուհանդերձ, մեկնաբանելով համաձայնագրին միանալու անհրաժեշտությունը, մեր կառավարությունն առիթն օգտագործել է հիշեցնելու, որ «աշխատանքներ են տարվում ՀՀ-ում ռուսական նախագծի ՋՋԷՌ-1000 նոր միջուկային էներգաբլոկի կառուցման ուղղությամբ»: Սակայն այդ ծրագրի իրականացման ժամկետները չեն հստակեցվում:

Հիշեցնենք. 2010 թ. օգոստոսի 20-ին Հայաստանի եւ Ռուսաստանի միջեւ կնքված համաձայնագրի համաձայն՝ ատոմակայնի նոր բլոկը նախատեսվում էր շահագործման հանձնել մինչեւ 2017թ. վերջը: Մինչ այդ գործող ՀԱԷԿ-ի բլոկը պետք է դուրս գար շահագործումից:

Նշենք, որ կառավարության գործունեության ծրագիրը թեեւ չի ներառում նոր ատոմակայանի կառուցման հարցը, բայց, փոխարենը նախատեսում է գործող ատոմակայանի 2-րդ էներգաբլոկի անվտանգության աստիճանի բարձրացում ու շահագործման ժամկետի երկարաձգում:

Փաստորեն, կառավարությունը չի մոռացել նոր ատոմակայանի կառուցման մասին, պարզապես որոշել է փոխել ժամկետները: Դրա համար թերեւս անհրաժեշտ է այդ մասին նոր համաձայնություն ձեռք բերել նաեւ ռուսական կողմի հետ, ինչի մասին առայժմ պաշտոնապես չի հայտարարվել: