Փաստ ինֆո

Երեւանում տեղի ունեցած հեղեղումները ոչ միայն անսպասելի չէին, այլեւ վաղուց կանխատեսվել էին բնապահպանների կողմից: Պարզապես եղավ այն, ինչի մասին իրենք բազմիցս զգուշացրել էին քաղաքային իշխանություններին ու անտարբերության հանդիպել:

«Սա դեռ շատ թեթեւ տարբերակն է: Այս կլիմայի փոփոխության պայմաններում մենք շատ ավելի լուրջ երեւույթներ կունենանք»,- ներկայացնելով մայրաքաղաքը հեղեղած անձրեւի բնապահպանական գնահատականը, նշեց «Հանուն կայուն մարդկային զարգացման ասոցիացիա» ՀԿ նախագահ Կարինե Դանիելյանը` հիշեցնելով, որ 1946-49 թթ. Երեւանում արդեն իսկ եղել են շատ ավելի ցավալի հետեւանքներով հեղեղումներ, երբ մայրաքաղաքի միջով հոսող գետերը դուրս են եկել հունից:

«Ամբողջ աշխարհը պատրաստվում է կլիմայի փոփոխության հետ կապված ռիսկերի բարձրացման, մենք լրիվ հակառակն ենք անում: Պարզ է մենք ցունամի չենք ունենա, բայց մենք լեռնային երկիր ենք եւ սելավների վտանգը շատ մեծ է»,- նշեց Կարինե Դանիելյանը:

Ի դեպ, բնապահպանի համոզմամբ, ժամանակին հենց այս վտանգը կանխելու նպատակով էր, որ Գետառին այդքան մեծ տարածք էր տրվել, գետը պատնեշվել էր բարձր եւ ամուր պատերով:

Մի քանի տարի առաջ Երեւանի Կենտրոնի երթեւեկության խնդիրը լուծելու նպատակով նոր ավտոճանապարհն անցկացվեց հենց Գետառի հունի վրայով: Բնապահպանները դեռ այն ժամանակ էլ զգուշացնում էին, որ հեղեղի դեպքում, գետը քանդելու է իր բետոնե կապանքներն ու լցվելու է երթեւեկելի հատված:

Կարինե Դանիելյանը հիշեցնում է նաեւ, որ ժամանակին սելավների մուտքը մայրաքաղաք կանխելու նպատակով, Ավանից դեպի հյուսիս մեծ ջրամբար էր կառուցվել, որը պետք է սելավներն ընդուներ ու թույլ չտար, որ ջուրը հասնի քաղաքի փողոցներ: Այս ջրամբարը մեր զրուցակցի խոսքով հիմա շինարարական աղբով է լցված:

«Մենք երկու սելավատար ունենք` Գետառը եւ Հրազդանը: Հրազդանի ամբողջ ափերով ռեստորաններ շարեցինք, եւ եթե ջուրը բարձրանա, այդ ռեստորանները քշելու է: Ինչ-որ հնարավոր է, հակառակ իմաստով, մեր քաղաշինությունն արել է: Փոխանակ վերականգնեին, բարեկարգեին քաղաքի գետային համակարգը, վրան շենքեր դրեցին: Փոխանակ դիտահորորեը վերականգնեին, վրան շենքեր դրեցին, դրենաժային համակարգն էլ քաղաքում նորմալ չի աշխատում: Ուղղակի պիտի Աստված կանչենք, որ այդ կլիմայի տատանումները մեզ մոտ ուժեղ չլինեն»,- ասաց Կարինե Դանիելյանը:

Ի դեպ, մայրաքաղաքին սպառնում են ոչ միայն սելավները, այլեւ գարնանը ջերմաստիճանի կտրուկ բարձրացման պարագայում, լեռներում սկսված հալոցքից առաջացած մեծ քանակությամբ ջրերը, որոնք եւս կարող են հեղեղել քաղաքը: Այսպիսի դեպք, ի դեպ, մի քանի տարի առաջ Երեւանում արդեն գրանցվել է, երբ հալոցքի հետեւանքով վարարած Հրազդանը դուրս էր եկել ափերից` հեղեղելով շրջակայքն ու ափերին կառուցված ռեստորանները:

Այդուհանդերձ, ստեղծված վտանգավոր իրավիճակից լուծումներ գտնել, բնապահպանի խոսքով, դեռ ուշ չէ: Իբրեւ օրինակ Կարինե Դանիելյանը բերեց Մոսկվայի ղեկավարության ընդունած որոշումը:

«Այն փոքրիկ գետակները, որ կային քաղաքում մեր Գետառի պես ծածկել էին եւ ուղղակի օղակի մեջ էին վերցրել, հիմա այդ բոլորը պայթեցնում են, վերադարձնում են քաղաքին իր բնական լանդշաֆտը»,- նշեց մեր զրուցակիցն ու հռետորական հարցով եզրափակեց զրույցը. «Չգիտեմ մեր այս ռեստորանները պայթեցնող կգտնվի՞»:

Հեղինակ` Նելլի Դանիելյան