Փաստ ինֆո

Հայաստանի Հանրապետության կառավարությունը կարևորում է կենսունակ, արդյունավետ գործող, հանրության առջև հաշվետու և յուրաքանչյուրի համար մատչելի անկախ դատարանների համար գործուն երաշխիքների ստեղծումը, ինչը կապահովի իրական արդարադատություն: Այս մասին նշված է ՀՀ կառավարության ծրագրում, որը նախօրեից քննարկվում է Ազգային ժողովում:

Գործադիրը, համաձայն իրավական և դատական բարեփոխումերի ռազմավարության, նախատեսում է առավել խիստ պահանջներ սահմանել դատավորների ու դատախազների մասնագիտական պատրաստման և դրա կազմակերպման նկատմամբ, ստեղծել գործուն երաշխիքներ՝ դատարանների ներքին անկախության համար:

Կառավարությունը մտադիր է բարձրացնել դատավորների ինքնակառավարման մարմինների գործունեության արդյունավետությունը: Մասնավորապես, նախատեսվում է խստացնել դատավորների վարքագծի կանոնների պահպանման նկատմամբ վերահսկողությունը և բարձրացնել նրանց կարգապահական պատասխանատվության ընթացակարգերի արդյունավետությունն ու թափանցիկությունը, կրճատել դատարանների կողմից գործերի քննության ժամկետները, ներդնել դատավորների գնահատման ու առաջխաղացման օբյեկտիվ չափանիշներ և ընթացակարգեր, վերջնականապես ներդնել դատարանների համապարփակ էլեկտրոնային կառավարման համակարգը, այդ թվում՝ հնարավոր դարձնելով էլեկտրոնային եղանակով հայցադիմումներ ներկայացնելը, ներդնել մարդու իրավունքների և հիմնարար ազատությունների խախտումների հետևանքով անձին պատճառված ոչ նյութական (բարոյական) վնասի ներպետական հատուցման կառուցակարգեր:

Նախատեսվում է նաև դատական և դատախազության համակարգերում մասնագետների պատրաստման նպատակով գործարկել Արդարադատության ակադեմիան, ապահովել դատական իշխանության և դատախազության մասնագետների համալրման օբյեկտիվ ու թափանցիկ ընթացակարգեր, ընդարձակել քրեական վարույթի ընթացքում մեղադրյալի և տուժողի կողմից իրենց իրավաչափ շահերը պաշտպանելու գործիքակազմը, խթանել արտադատական կարգով վեճերի լուծման այլընտրանքային ընթացակարգերը, ապահովել արդարադատությանը վերաբերող վիճակագրական համապարփակ տվյալների հասանելիությունը համացանցում՝ դրանով իսկ ավելացնելով համապատասխան համակարգերի հաշվետվողականությունը և հանրային վերահսկողությունը վերջիններիս նկատմամբ:

Ըստ ծրագրի, կառավարությունն էապես խստացնելու է իրավապահ մարմինների ծառայողների կողմից անձի իրավունքների խախտման համար պատասխանատվությունը և ապահովելու է դրա անխուսափելիության գործնական երաշխիքները:

Կոռուպցիայի դեմ պայքարի շրջանականերում կառավարությունը, մասնավորապես, նախատեսում է ուժեղացնել էթիկայի հանձնաժողովի դերը, օրենսդրության մեջ վերացնել այն կարգավորումները, որոնք կոռուպցիոն ռիսկերի դրսևորման համար ստեղծում են բարենպաստ միջավայր, գործուն քայլեր կատարել բիզնեսը և քաղաքականությունը սահմանազատելու, պետական կառավարման ապարատը բիզնեսից տարանջատելու ուղղությամբ: