Փաստ ինֆո

Թերթի ուշադրության կենտրոնում է Գեղարքունիքի մարզի Վերին Գետաշեն գյուղի բնակիչ, Նոյեմբերյանի զորամասերից մեկի զինծառայող Լյուքս Ստեփանյանի մահվան դեպքը: Թղթակիցը զրուցել է նրա հոր` Աշխարհիկ Ստեփանյանի հետ:

Լրագրողի այն հարցին, թե որն էր տղայի դին Երևան բերելու որոշում կայացնելու պատճառը, Ա.Ստեփանյանը պատասխանել է. «Ինձ ոչ մեկ հստակ բան չէր ասում: Ես ուզում էի իմանալ, թե իմ տղեն ոնց ա ծառայել, ինչ ա արել, որ սիրտս մի քիչ հանգստանար: Իմ տղայի զորամասից էին եկել, հարցեր էի տալիս, որ գոնե իրանք մի բան պատմեին տղուս մասին, դռան հետևը կանգնած էին:

Տեսա որ ոչ մի բան չեն ասում, իրանց տնից դուրս հանեցի: Մայիսի 17-ի գիշերը ես ու կինս որոշեցինք մեր երեխուն վերցնենք տանենք հրապարակ:

Ճանապարհը փակեցին, Մարտունիից մինչև Սևան ռազմական ոստիկանության մեքենան, աջից ձախից խփում էր: Ես չգիտեմ ոնց էին իմացել մեր գալու մասին»:

Սպանված զինծառայողի հայրը թղթակցի հետ զրույցում նաև նշել է, որ տղայի զինգրքույկում գրված է` «ոչ պիտանի շարային ծառայության»:

Ըստ նրա` բժշկական ստուգումներ անցնելուց հետո Լյուքսի մոտ սրտային անբավարարություն է հայտնաբերվել, սակայն Լյուքսը կամավոր է գրվել և գնացել ծառայելու:

«Միայն 5-6 ամիս հետո պետք ա տանեին դիրքեր, բայց իմ տղուն մի ամիս հետո դիրքեր են տարել: Ես էլ ռազմական ոստիկաններից հարցրի, թե իմ էրեխուն, որ ոչ շարային ծառայող ա, դուք ո՞նց եք տանում դիրքեր: Ինձ պատասխանեցին, թե զինվորները չեն հերիքում, դրա համար էլ տարել են»,- պատմել է զինվորի հայրը` Ա.Ստեփանյանը:

Սպանության պատճառը, ինչպես գրում է թերթը, եղել է «պզուկ» բառը: Թերթը մեջբերում է պաշտպանության նախարար Ս.Օհանյանի` զինվորի հորը պատմած մանրամասներից: Նախարարը մասնավորապես պատմել է. «Վեճն սկսվել է «պզուկ»-ից , տղան ասել է` ինձ մի վիրավորիր, նա ասել է` չեմ վիրավորում, դու ով ես ու կրակել է»: Նախարարը միաժամանակ հավելել է, որ նախնական տվյալներով այդպես է եղել, քրեական գործի շրջանակներում կլինեն այլ մանրամասներ: