Փաստ ինֆո

Վերաքննիչ քրեական դատարանի վարույթում է նախկին զինծառայողներ Վիլհելմ Ենգիբարյանի, Հրանտ Կարապետյանի և Ռոբերտ Բադալյանի գործով բերված վերաքննիչ բողոքը:

Ըստ դատավճռի` 2011թ. հունվարի 23-ին` ժամը 21:00-ի սահմաններում, ենթասպա Վ.Ենգիբարյանը սպայական սենյակ է կանչել վաշտում «հեղինակություն» վայելողներ Կարապետյանին ու Բադալյանին և պատմել, որ շարքային Թորգոմ Սարուխանյանը Ենգիբարյանի կողմից վատ վերաբերմունքի, կոպիտ դիտողությունների համար գանգատվել է զորամասի իրային ծառայության պետին:

Կարապետյանն ու Բադալյանը Սարուխանյանի արարքը «ախտորոշել» են որպես բոզություն և բռնություն գործադրել Սարուխանյանի նկատմամբ. հարվածել են նրան, անվանել բ..., արածը` բոզություն, ստորացրել են շարքային Սարուխանյանի պատիվն ու արժանապատվությունը, նվաստացրել նրան, միջանցքում գտնվող զինվորների ներկայությամբ նրան կոչել մատնիչ և բ...:

Ըստ դատավճռի` Սարուխանյանը, այլևս չդիմանալով իր նկատմամբ բազմիցս գործադրված ստորացուցիչ հալածանքներին, 2011թ. փետրվարի 12-ին` ժամը 16:35-ին, իրեն ամրակցված ինքնաձիգից պահակակետում մեկ կրակոց է արձակել կրծքավանդակի ձախ շրջանին` այդկերպ ինքնասպան լինելով:

Վ.Ենգիբարյանը, Հ.Կարապետյանն ու Ռ.Բադալյանը դատարանում իրենց մեղավոր չեն ճանաչել:

Սպանված Սարուխանյանի մոտ երկտող է հայտնաբերվել: Դատահոգեբանական փորձագետի եզրակացությամբ` ինքնասպանությանը նախորդած ժամանակահատվածում Թ.Սարուխանյանը գտնվել է հոգեկան լարված վիճակում: Վ.Ենգիբարյանի, Հ.Կարապետյանի, Ռ.Բադալյանի և Թ.Սարուխանյանի` ինքնասպանություն կատարելու նախորդած հոգեվիճակի միջև, ըստ փորձագետի, ամենայն հավանականությամբ գոյություն ունի պատճառահետևանքային կապ:

Ընդհանուր իրավասության առաջին ատյանի դատարանը ամբաստանյալներին մեղավոր էր ճանաչել` շարքային Թ.Սարուխանյանին ինքնասպանության հասցնելու համար:

Դատարանի դատավճռով Վ.Ենգիբարյանը և Ռ.Բադալյանը դատապարվել են ազատազրկման` 5 տարի, իսկ Հ.Կարապետյանը` 5 տարի 6 ամսի ժամկետով: