Փաստ ինֆո

Կառավարությունը դեռևս շատ անելիքներ ունի, որպեսզի պետությունից յուրաքանչյուր քաղաքացու ակնկալիքները դարձնի իրականություն: Այս մասին Ազգային ժողովի մայիսի 20-ի նիստում հայտարարեց ՀՀ վարչապետ Տիգրան Սարգսյանը՝ ԱԺ-ի հավանությանը ներկայացնելով կառավարության ծրագիրը:

Ըստ նրա, առաջիկայում, մասնավորապես, կառավարությունն ապահովելու է բարձր աշխատավարձով աշխատատեղերի ստեղծում` արտահանմանը նպաստող արդյունաբերական քաղաքականության լիարժեք իրականացման միջոցով, կուտակային կենսաթոշակային համակարգի գործարկում՝ միտված արժանապատիվ ծերության ապահովմանը, աշխատավարձերի համակարգված բարձրացում, կրթության որակի և հասանելիության ապահովում` որպես առկա հիմնախնդիրների հաղթահարմանն ուղղված հիմնական միջոց, պարապուրդի մատնված ձեռնարկությունների վերագործարկում՝ անհրաժեշտության դեպքում ոչ արդյունավետ սեփականատիրոջը փոխարինելով բանիմաց, զարգացմանը միտված ծրագրեր ունեցող գործարարով, յուրաքանչյուր ձեռնարկությանը, կարիքներին համապատասխան առարկայական, նպատակային աջակցություն, փոքր և միջին ձեռնարկությունների համար բարենպաստ բիզնես միջավայրի ապահովում, սկսնակ բիզնեսմեններին անհատական աջակցություն: Կառավարության առաջնային խնդիրներից են նաև առողջապահության ոլորտում հասանելիությունը և որակի բարձրացումը, գույքահարկի արդարացի համակարգի ներդրումը:

Ի պատասխան անկախ պատգամավոր Խաչատուր Քոքոբելյանի դիտարկմանը, թե «որևիցե կոնկրետ, որևիցե հստակ մոտեցում այս ծրագրում» ինքը չի տեսնում, վարչապետը վստահեցրեց. «Վերջին 20 տարիների ընթացքում երբևիցե Հայաստանի Հանրապետության կառավարությունը այսքան կոնկրետ ծրագիր չի ներկայացրել ԱԺ-ի հաստատմանը: Առաջին անգամ ՀՀ-ի պատմության մեջ մենք առարկայական՝ 18 ճյուղերով, մասնավոր հատվածի հետ համագործակցելով, մշակել ենք առարկայական ծրագրեր՝ ժամանակացույցերով, և ֆիքսել ենք պետության և մասնավոր հատվածի անելիքները»:

Տ.Սարգսյանն ընդգծեց, որ թիրախները լինելու են գործազրկությունը, արտագաղթը և աղքատությունը: