Փաստ ինֆո

«Հետաքննող լրագրողներ»-ը դեռ սպասում են Ոստիկանության պաշտոնական դիրքորոշման հրապարակմանը: «Մենք սպասում ենք, որ իրենք ինչ-որ բան ասեն, նոր մենք կասենք»,-«Փաստինֆո»-ին ասաց ՀԿ նախագահ Էդիկ Բաղդասարյանը:

Հիշեցնենք, մայիսի 8-ին «Հետք»-ի լրագրող Անի Հովհաննիսյանը հեռախոսազանգ էր ստացել ին ՌԴ-ում գրանցված բջջային հեռախոսահամարից: Զանգահարողը սպառնացել էր, որ եթե նա շարունակի «քիթը խոթել» այնտեղ, որտեղ պետք չէ, ոչ միայն իր, այլեւ ընտանիքի անդամների համար շատ վատ կլինի: «Թե չէ, Անի ջան, կհայտնվես փոսում կամ դու, կամ քո հարազատներից մեկն ու մեկը»,- ըստ «Հետք» պարբերականի, ասել էր սպառնացողը:

«Հետք»-ի գլխավոր խմբագիրը մեզ հետ զրույցում նաեւ տեղեկացրեց, որ Անիին մի քանի անգամ կանչել են Ոստիկանություն, հարցաքննել, նա «ներգրավված է որպես տուժող»,- ասաց «Հետք»-ի խմբագիրը:

Իսկ Ոստիիկանության լրատվության վարչությունից «Փաստինֆո»-ին տեղեկացրեցին, որ Քրեական գործ առայժմ չի հարուցվել: «Դեպքի առնչությամբ ոստիկանությունում դեռ նյութեր են նախապատրաստվում, կատարվում են համապատասխան քննչական գործողություններ»:

Նշենք, որ «Հետք»-ի խմբագրությունը հեռախոսային ձայնագրությունն ու հեռախոսահամարը փոխանցել էր Ոստիկանություն: Բայց, Ոստիկանությանը զուգահեռ «Հետք»-ում այս հարցի շուրջ նաեւ սեփական հետաքննությունն են անցկացնում, որի արդյունքների հրապարակումը, փաստորեն, ինչպես պարզ դարձավ Էդիկ Բաղդասարյանի խոսքից, կախված է նաեւ Ոստիկանության հրապարակելիք պաշտոնական գնահատականից: