Փաստ ինֆո

Ռուսաստանի բնակչության կեսից ավելին անհրաժեշտ է համարում հարկադրաբար բուժել միասեռականներին և լեսբուհիներին, իսկ բնակչության ¼-ը գտնում է, որ պետք է արգելել համասեռականության ցանկացած դրսևորում, հաղորդում է «interfax»-ը՝ հղում անելով «Լևադա Ցենտր»-ի կողմից անցկացված հարցումների արդյունքներին:

Հաղորդագրության մեջ նշվում է, որ համասեռականներին և լեսբուհիներին ռուսաստանցիներն ավելի վատ են վերաբերում, քան այլ ազգերի, կրոնների, սոցիալական խավերի ներկայացուցիչներին: Հարցվածների կեսից ավելին (51 տոկոսը) կողմ են, որպեսզի ոչ ավանդական սեռական կողմնորոշման ներկայացուցիչների նկատմամբ օրենսդրական հետապնդում և հարկադիր բուժման մոտեցում իրականացվի: Միայն 8 տոկոսն է գտնում, որ այդպիսի մարդկանց պետք է օգնել հասարակության մեջ իրենց հարմարավետ զգալու համար: Իսկ հարցվածների 31 տոկոսն առաջարկել է համասեռականներին և լեսբուհիներին, պարզապես, հանգիստ թողնել:

«Լևադա Ցենտր»-ի տվյալներով` Ռուսաստանի բնակիչների 43 տոկոսը ոչ ավանդական սեռական կողմնորոշման մարդկանց համարել է բարոյապես սանձարձակ, իսկ 35 տոկոսը նրանց վերաբերում է, որպես հոգեբանորեն ոչ լիարժեք մարդկանց: Հարցվածների գրեթե կեսը (47 տոկոսը) հանդես են գալիս այդպիսի մարդկանց իրավունքները սահմանափակելու օգտին, իսկ 44 տոկոսը գտնում է, որ պետությունը չպետք է պաշտպանի համասեռականներին և լեսբուհիներին՝ միջավայրի ագրեսիվ վերաբերմունքից:

Հաղորդագրության մեջ նշվում է, որ անցած մեկ տարում 7 տոկոսով նվազել է սեռական փոքրամասնությունների և ավանդական կողմնորոշում ունեցող մարդկանց իրավունքների հավասարության կողմնակիցների թիվը: Այսպես, 2012 թ.-ին այդ հարցին դրական էին արձագանքել հարցման մասնակիցների 46, իսկ 2013թ.-ին՝ 39 տոկոսը:

Սոցիոլոգները նշում են, որ սեռական փոքրամասնությունների նկատմամբ խտրականության դրսևորումներն արգելելու օգտին կողմ են եղել հարցվածների 37 տոկոսը: Նույնքան մարդ էլ արտահայտվել է նման միջոցների իրականացման դեմ: Իսկ 26 տոկոսն այդ հարցին դժվարացել է պատասխանել:

Այժմ ՌԴ Պետդումայի քննարկմանն է ներկայացված Ռուսաստանում միասեռականության քարոզն արգելելու մասին օրենքի նախագիծը: Պատգամավորներն այն արդեն ընդունել են առաջին ընթերցմամբ: Օրենքի նախագիծը երկրի տարածաշրջաններից ստացել է 47 դրական արձագանք: Այն ընդունելուն դեմ են հադես եկել իրավապաշտպանները, որոնք նշել են, որ օրենքի նախագիծը հակասում է Մարդու իրավունքների և հիմնական ազատությունների պաշտպանության եվրոպական կոնվենցիային:

«lenta.ru» կայքը նշում է, որ Ռուսաստանի մի շարք տարածաշրջաններում արդեն գործում են համասեռականության քարոզումն արգելող օրենքներ: Մասնավորապես այդպիսի իրավական փաստաթղթեր են ընդունվել Ռյազանի, Արխանգելսկի, Կոստրոմայի և Նովոսիբիրսկի մարզերում, ինչպես նաև՝ Սանկտ-Պետերբուրգում:

Մարդու իրավունքների պաշտպանության եվրոպական գործակալության հարցումների տվյալների համաձայն, եվրոպացի համասեռականների ավելի քան ¼-ը վերջին 5 տարիների ընթացքում առնվազն մեկ անգամ դարձել է հարձակման և սպառնալիքի զոհ: Հարցվածների 19 տոկոսը բողոքել է աշխատավայրում իր նկատմամբ ցուցաբերված խտրականությունից, իսկ հարցմանը մասնակցած դպրոցականների և ուսանողների 2/3-ը հայտարարել են, որ ստիպված են ուսումնական հաստատությունում թաքցնել իրենց սեռական կողմնորոշումը: