Փաստ ինֆո

Մայիսի 14-ին դատարանը Ռոբերտ Հովսեփյանին մեղավոր է ճանաչել` գողություն կատարելու համար և դատապարտել ազատազրկման` 7 տարի ժամկետով: Մայիսի 15-ից ամբաստանյալը հացադուլ է հայտարարել` այդկերպ իր բողոքն արտահայտելով դատարանի վճռի նկատմամբ:

Գողության համար դատապարտված Ռ.Հովսեփյանի հարազատները, սակայն, պնդում են, որ դատավճիռը կայացվել է կեղծ մեղադրանքի հիման վրա:

Ըստ ամբաստանյալի մոր` իր տղան գողության կասկածանքով անցած տարվա հոկտեմբերի 3-ին ևս 5 անձանց հետ բերման է ենթարկվել ոստիկանության բաժին:

Բերման ենթարկված երիտասարդը, ինչպես ներկայացնում է թերթը, ի սկզբանե կասկածվել է գողությունների շարք իրականացնելու մեջ: Սակայն առաջադրված 7 դրվագներից կազմված մեղադրանքից 6-ը հանվել է նախաքննության ընթացքում:

Ըստ դատապարտյալ Ռ.Հովսեփյանի` ինքը խոստովանական ցուցմունքներ է տվել ֆիզիկական հաշվեհարդարի սպառնալիքի ներքո:

Թերթը գրում է, որ Ռ.Հովսեփյանի մոր փոխանցմամբ` փաստաբանի և տղայի հարազատների պահանջով փորձաքննություն է անցկացվել, որի արդյունքում նրա մարմնի վրա բազմաթիվ վնասվածքներ և կապտուկներ են հայտնաբերվել:

Թերթը նաև նշում է, որ 2008թ. հունիսից Ռ.Հովսեփյանը հաշվառված է նյարդաբանական դիսպանսերում` միաժամանակ հիշեցնելով, որ ոստիկանների գործողությունները բողոքարկելու արդյունքում Կենտրոնի ոստիկանության բաժնի երկու օպերլիազորներին` Խաչիկ Բախբուդարյանին և Արտակ Բարսեղյանին, մեղադրանք առաջադրվեց` ՀՀ քրեական օրենսգրքի 309-րդ և 314-րդ հոդվածներով :