Փաստ ինֆո

Արմավիրի, Գեղարքունիքի, Լոռու, Կոտայքի, Շիրակի մարզերի 7 համայնքներում մայիսի 26-ին կայանալիք տեղական ինքնակառավարման մարմինների ընտրություններին դիտորդական առաքելություն իրականացնելու նպատակով հավատարմագրվել են 3 տեղական հասարակական կազմակերպությունների 46 ներկայացուցիչներ:

Ինչպես «Փաստինֆո»-ի թղթակցին հայտնեց Կենտրոնական ընտրական հանձնաժողովի նախագահի մամուլի քարտուղար Հերմինե Հարությունյանը, «Շահեն»-ը հայտավորել է 24, «Թրանսփարենսի ինթերնեշնլ հակակոռուպցիոն կենտրոն»-ը և «Իրավունքի Եվրոպա միավորում»-ը՝ 11-ական դիտորդի:

Նախօրեին՝ մայիսի 16-ին, լրացել է դիտորդների հավատարմագրման և ընտրություններին գրանցված թեկնածուների ինքնաբացարկ հայտնելու վերջնաժամկետը:

Այսպիսով՝ Նոր Հաճնի քաղաքապետի պաշտոնին հավակնում են երկու թեկնածուներ՝ 2009թ.-ից գործող քաղաքապետ, «Բարգավաճ Հայաստան» կուսակցության կողմից առաջադրված ԲՀԿ-ական Գագիկ Մաթևոսյանը և ինքնաառաջադրված անկուսակցական, ՀՀ Նախագահի աշխատակազմի աշխատակից Շուշանիկ Նազարյանը:

Արմավիրի Վարդանաշեն գյուղական համայնքի ղեկավարի պաշտոնի համար պայքարում են ինքնաառաջադրված 4 թեկնածուներ՝ գործող գյուղապետ, ՀՀԿ անդամ Արթուր Մանուկյանը, նրա կուսակից Հայկ Սահակյանը և անկուսակցականներ Աշոտ Հայրապետյանը, Գրիգոր Սահակյանը:

Շիրակի մարզի Ախուրիկ համայնքում գյուղապետի պաշտոնին հավակնում են 2 թեկնածուներ՝ ՀՀԿ-ի կողմից առաջադրված գործող գյուղապետ, հանրապետական Վարդիթեր Գասպարյանը և ինքնաառաջադրված անկուսակցական Սարգիս Սարգսյանը:

Կոտայքի մարզի Նուռնուս համայնքում գյուղապետի պաշտոնին հավակնում են ինքնաառաջադրված 2 թեկնածուներ՝ գործող գյուղապետ, «Բարգավաճ Հայաստան» կուսակցության անդամ Մնացական Գևորգյանը և անկուսակցական Վանիչկա Ոսկանյանը:

Լոռու մարզի Լեջան գյուղական համայնքում կայանալիք ավագանու ընտրություններին մասնակցում են 5 թեկնածուներ՝ 4 ՀՀԿ-ականներ և մեկ ՕԵԿ-ական:

Գեղարքունիքի մարզի Արծվանիստ համայնքում ավագանու ընտրություններին մասնակցում են ինքնաառաջադրված 9 թեկնածուներ, որոնցից 5-ը՝ ՀՀԿ անդամներ, 4-ը՝ անկուսակցականներ:

Գեղարքունիքի մարզի Սեմյոնովկա համայնքում ավագանու ընտրություններին մասնակցում են 6-ը՝ 5 անկուսակցականներ և մեկ ԲՀԿ-ական: