Փաստ ինֆո

Կառավարությունն այսօր հաստատել է իր գործունեության ծրագրի նախագիծը: Այն այժմ ընդունված կարգով կներկայացվի արդեն ԱԺ-ի քննարկմանն ու հաստատմանը: Սահմանադրությունը նախանշում է. «Կառավարության ծրագրին ԱԺ-ի կողմից հավանություն տալու հարցը քննարկվում է արտահերթ և քվեարկության դրվում այն ներկայացվելուց հետո՝ հնգօրյա ժամկետում: Կառավարության ծրագրին հավանություն տալու մասին որոշումն ընդունվում է Ազգային ժողովի պատգամավորների ընդհանուր թվի ձայների մեծամասնությամբ»:

Դե իսկ, եթե Ազգային ժողովը երկու անգամ անընդմեջ երկու ամսվա ընթացքում հավանություն չի տալիս կառավարության ծրագրին, Հանրապետության Նախագահն արձակում է Ազգային ժողովը:

Կառավարության ծրագրի նախաբանում ասված է. «Հայաստանի Հանրապետության կառավարության ծրագիրը մշակվել է` հիմք ընդունելով Հայաստանի Հանրապետության ազգային անվտանգության ռազմավարության, Հայաստանի Հանրապետության Նախագահի, Հայաստանի հանրապետական կուսակցության և «Օրինաց երկիր» կուսակցության նախընտրական ծրագրերի հիմնական դրույթները, ինչպես նաև պառլամենտական կուսակցությունների ծրագրերում ներկայացված` նշված փաստաթղթերի հետ համադրելի գաղափարները:

Հայաստանի Հանրապետության կառավարության ծրագիրն ուղղված է մարտունակ և ապահով պետության կերտմանը. պետություն, որն ապահովելու է Հայաստանի Հանրապետության յուրաքանչյուր քաղաքացու ազատությունը, անվտանգությունն ու բարեկեցությունը: Հայաստանի Հանրապետության քաղաքացին լինելու է պաշտպանված և ազատ` իր ապագան հայրենիքում կերտելու համար: Հայրենիքը դառնալու է ապահով հանգրվան յուրաքանչյուր հայի համար, որն ընձեռում է աննկուն կամքով և հետևողական աշխատանքով սեփական կարողությունների առավելագույն դրսևորման հնարավորություն»:

Կառավարությունն այս ծրագրով նպատակ է դնում հնարավորություն ստեղծել քաղաքացիներին արժանապատիվ աշխատանք եւ վաստակ ունենալու:

«Յուրաքանչյուրը պետք է վստահ լինի, որ աղքատությունն ու գործազրկությունը ոչ թե ճակատագիր են, այլ ամենօրյա աշխատանքով հաղթահարվող դժվարություն: Յուրաքանչյուրը պետք է համոզված լինի, որ իր զավակների ապագան ավելի ապահով և լավն է լինելու հայրենիքում, քան օտար ափերում»,-ասված է ծրագրում:

Իսկ բարեկեցիկ կյանք ապահովող վաստակ ունենալու համար կառավարությունը խոստանում է ապահովել աշխատավարձերի համակարգված աճ՝ միտված աշխատատեղերը պահպանելուն և նորերի ստեղծումը խթանելուն:

Որպես աղքատության դեմ պայքարի «հիմնական զենք» գործադիրը նախանշում է կրթությունն ու աշխատանքը:

«Յուրաքանչյուր ոք պետք է ստանա որակյալ կրթություն և բժշկական օգնություն ու սպասարկում` անկախ բնակության վայրից, հանրային դիրքից և եկամտի չափից, ընդլայնվելու է նաև միջին մասնագիտական կրթության ոլորտը: Անապահով ընտանիքի երեխաները կունենան անվճար ուսում ստանալու հնարավորություն: Աստիճանաբար կընդլայնվի առողջության ապահովագրության համակարգը՝ ապահովելով բոլոր քաղաքացիների համար բժշկական ծառայությունների լայն տեսականու մատչելիություն:

Գործարկվելու է կուտակային կենսաթոշակային համակարգը: Գոյություն ունեցող կենսաթոշակների աճին զուգընթաց այն հնարավորություն կտա հազարավոր քաղաքացիներին տնօրինելու աշխատանքային տարիների ընթացքում իրենց կուտակած և նույնչափ պետությունից՝ որպես աջակցություն ստացած գումարները»,- մատնանշում է կառավարության ծրագիրը:

Թվարկված փոփոխություններին հասնելու հիմնական ուղին էլ, ըստ կառավարության, տնտեսության աճն ու զարգացում է: «Տնտեսական աճ կարող ենք ապահովել արդար, օրենսդրորեն հստակ կարգավորված պայմանների պահպանման և միաժամանակ տնտեսավարողին հասցեական, թափանցիկ աջակցություն ապահովելու դեպքում»:

Կառավարությունը նաեւ հայտարարում է, թե շարունակելու է աջակցել աշխատատեղ ստեղծող և արտահանում ապահովող ձեռնարկություններին: Ինչպես նաեւ խոստանում է, որ իր գործունեության եւ ներկայացված ծրագրի իրականացման արդյունքում «կկրճատվեն աղքատությունն ու գործազրկությունը, կնվազի արտագաղթը, կամրապնդվեն ժողովրդավարական ինստիտուտները՝ նպաստելով իրավունքի գերակայության ամրապնդմանը»:

«Այս տեսլականի նկատմամբ հավատն է, որ մեզ ուժ կտա փոխվելու: Այս տեսլականի նկատմամբ հավատն է, որ մեզ ուժ կտա վերափոխելու մեր երկիրը: Այս տեսլականի նկատմամբ հավատն է, որ մեզ ուժ կտա հետևողականորեն կերտելու ապահով Հայաստան՝ սերունդներին թողնելով անվտանգ, արդար և ապահով պետություն»,- իր ծրագրի նախաբանը եզրափակում է ՀՀ նորանշանակ գործադիր մարմինը: