Փաստ ինֆո

«Ես նաև Ալեքսանդր Լուկաշենկոյին ծանոթացրեցի Լեռնային Ղարաբաղի հիմնախնդրի կարգավորման բանակցային գործընթացի ներկայիս ընթացքին: Եվս մեկ անգամ ընդգծեցի, որ Ղարաբաղի ժողովուրդը ցանկանում է խաղաղություն և իր պատմական հայրենիքում ազատ զարգանալու հնարավորություն: Նրանք ցանկանում են իրենց ինքնիշխանության միջազգային ճանաչմանը հասած այլ ժողովուրդների հետ հավասար հնարավորություններ»,- հավելել է Հայաստանի ղեկավարը: 

 

Ս.Սարգսյանն ընդգծել է, որ  որոշակի և բազմախոստում ծրագրեր կան առևտրատնտեսական և ներդրումային համագործակցության ոլորտում, ապրանքների և ծառայությունների փոխադարձ մուտք մեր երկրների շուկաներ, փոխգործակցություն զբոսաշրջության, գյուղատնտեսության ոլորտներում, համագործակցություն մշակույթի և գիտության բնագավառներում: Երկու երկների ղեկավարները տեսնում են նաև մեծ հնարավորություններ  բարձր տեխնոլոգիաների ոլորտում:

 

ՀՀ նախագահը նշել է նաև, որ Բելառուսի ղեկավարի այցին նախորդող մեծաքանակ շփումներն ամենատարբեր մակարդակներում նպաստել են Հայաստանում այսօր  փաստաթղթերի ծանրակշիռ փաթեթի ստորագրմանը: «Մենք ակնկալում ենք, որ դրանք սպասվող ազդակ կհաղորդեն երկկողմ համագործակցությանը»,- նշել է Սերժ Սարգսյանը՝ համոզմունք հայտնելով, որ իր բելառուս գործընկերոջ  այցը ժամանակին է և դատապարտված է հաջողության:

 

Երկու երկրների նախագահները   քննարկել են  ամենաբազմազան՝ տնտեսության, աշխարհաքաղաքական հարցերի, հումանիտար կապերի վերաբերող հարցեր: Խոսք է գնացել նաև Առևտրատնտեսական համագործակցության հարցերով միջկառավարական հանձնաժողովի գործունեության մասին, որի հերթական նիստը կկայանա ընթացիկ տարվա հունիսին: Առանձնահատուկ ուշադրություն է հատկացվել  միջազգային կազմակերպությունների շրջանակներում երկու երկրների  փոխգործակցության ամրապնդմանը վերաբերող հարցերին: Մտքեր են  փոխանակվել  ՀԱՊԿ շրջանակում համագործակցության զարգացման շուրջ, խոսվել է  ԱՊՀ-ում գործընթացների մասին, որտեղ Հայաստանը  պատրաստ է անհրաժեշտ աջակցություն ցուցաբերել բելառուս բարեկամներին՝ Համագործակցությունում նրանց նախագահության հաջողության ապահովման նպատակով:

 

ՀՀ նախագահն ընդգծել է, որ երկու երկրներն ուղիղ մեկ ամիս հետո  նշելու են երկու երկրների միջև դիվանագիտական հարաբերությունների հաստատման 20-ամյակը: Աայդ տարեթվին  երկրները  մոտենում են՝  ունենալով ոչ միայն երկկողմ համագործակցության համապատասխան մակարդակ, այլ նաև՝ ամուր գիտակցումով, որ այս տարիների ընթացքում կուտակված միջպետական փոխգործակցության դրական փորձը հանդիսանում է  երկու երկրների  ընդհանուր սեփականությունը:

 

Մինչ լրագրողների հետ հանդիպումը ՀՀ Նախագահի նստավայրում տեղի են ունեցել  երկու երկրների նախագահների առանձնազրույցն ու պաշտոնական պատվիրակությունների մասնակցությամբ ընդլայնված կազմով բանակցությունները:  Դրանց արդյունքներով՝ այնուհետ ստորագրվել են երկկողմ համագործակցության զարգացմանն ու խորացմանն ուղղված մի շարք փաստաթղթեր՝  «Հայաստանի Հանրապետության կառավարության և Բելառուսի Հանրապետության կառավարության միջև ազգային փոքրամասնություններին պատկանող անձանց իրավունքների ապահովման     բնագավառում համագործակցության մասին», «Հայաստանի Հանրապետության կառավարության և Բելառուսի Հանրապետության կառավարության միջև միջուկային անվտանգության և ճառագայթային պաշտպանության ոլորտում համագործակցության և տեղեկատվության փոխանակման մասին», «Հայաստանի Հանրապետության գյուղատնտեսության նախարարության և Բելառուսի Հանրապետության գյուղատնտեսության և պարենի նախարարության միջև գյուղատնտեսության բնագավառում համագործակցության մասին» համաձայնագրեր, «Հայաստանի Հանրապետության գյուղատնտեսության նախարարության և Բելառուսի Հանրապետության արդյունաբերության նախարարության միջև համագործակցության զարգացման մասին» փոխըմբռնման հուշագիր և «2013-2014 թվականներին ֆիզիկական կուլտուրայի և սպորտի բնագավառում Հայաստանի Հանրապետության սպորտի և երիտասարդության հարցերի նախարարության և Բելառուսի Հանրապետության սպորտի և տուրիզմի նախարարության միջև» համագործակցության ծրագիր: