Փաստ ինֆո

Արդեն տեղեկացրել ենք, որ Հենրիխ Մխիթարյանը Ուկրաինայի առաջնության 28-րդ տուրի «Շախտյոր» - «Տավրիա» խաղում դառնալով երկու գոլի հեղինակ՝ մրցաշարի արդյունավետության ռեկորդ է սահմանել: Հանդիպումից հետո նա պատասխանել է Դոնեցկի ակումբի պաշտոնական կայքի հարցերին:

-Հենրիխ, առաջնության 23-րդ գոլը հավանաբար ամենածանրերից է՞ր Ձեր կարիերայում:

-Կարող եմ ասել՝ այո: Լարվածությունը չէր լքում, ու այնքան էլ հեշտ չէր, բայց շնորհակալություն տղաներին, որ օգնեցին գոլի հեղինակ դառնալ: Շնորհակալություն ողջ թիմին: Շնորհավորում եմ նաեւ երկրպագուներին եւ բոլոր նրանց, ովքեր սպասում էին այս գոլին: Հուսով եմ, դրանից հետո շատ ավելի հեշտ կլինի:

-Դնեպրոպետրովսկում 11 մետրանոցի իրացման իրավունքը զիջեցիր Սրնային: Իսկ այսօր ինչու՞  որոշեցիր ստանձնել այդ պատասխանատվությունը:

-Այն ժամանակ որոշել էինք, որ պետք է իրացնի այն ֆուտբոլիստը, ով կարող է ավելի լավ անել դա: Իրացրեց Դարիոն: Իսկ այսօրվա խաղից առաջ Միստերը (Միրչա Լուչեսկուի մականունն է – հ.կ.) ասաց, որ 11-մետրանոցի իրավունք ստանալու դեպքում պետք է ես իրացնեմ: Հանդիպման ժամանակ, երբ մրցավարը 11-մետրանոց նշանակեց, Դարիոյին խնդրեցի, որ ինքը իրացնի, սակայն նա մերժեց, ինչի համար շնորհակալ եմ նրան:

-Իսկ ի՞նչ կասեք «Տավրիայի» մասին:

-Ավելի լավ է մերոնց մասին խոսեմ: Ապացուցեցինք, որ կարող ենք խաղալ: Այսօր գործում էինք այնպես, ինչպես խնդրել էր մարզիչը՝ ագրեսիվ եւ արագ: Առաջին խաղակեսում խփած 3 գոլերը զգալիորեն հեշտացրեցին մեր խնդիրը եւ ընդմիջումից հետո այլեւս դժվար չէր: Տեսանք, որ կարող էինք ավելի շատ գոլ խփել, սակայն հաշիվը մնաց 5:0:

- Հիմա, երբ արդեն 24 գոլ եք խփել, այնքան էլ դժվար չէ գերազանցել նաեւ «Շախտյորի» խորհրդային տարիների լավագույն ռմբարկու Ստարուխինի ռեկորդը: Մտածում ե՞ք այդ մասին:

-Եթե մտածեմ, դարձյալ դժվար կլինի:

-Այսինքն, կենտրոնացել էիք ա՞յս թվի վրա:

-Եթե կենտրոնանամ, շատ ավելի բարդ կլինի: Պատասխանատվությունը չափազանց մեծ է: Այսօր առաջին խաղակեսում ունեի չասենք 100 տոկոսանոց, բայց, հիրավի, 60-70 տոկոսանոց երեք հնարավորություն, բայց չկարողացա իրացնել դրանք: Հավանաբար խանգարեց ուժեղ ցանկությունը:

-Գիտակցում ե՞ք, որ ռեկորդ եք սահմանել:

-Իհարկե, հանդերձարան մտնելիս, երբ նայեցի հեռախոսիս, միանգամից գիտակցեցի: Սակայն առայժմ չեմ հասցրել պատասխանել ոչ մեկին:

-Իսկ թիմակիցներն ինչպե՞ս շնորհավորեցին:

-Ինքներդ էլ տեսաք: Նրանք իսկապես ինձանից շատ էին ուրախացել, եւ դա անչափ հաճելի է: Սա ոչ միայն իմ, այլեւ ողջ թիմի ռեկորդն է: Բոլոր տղաներն էլ աջակցում էին խփելու այդ 24 գոլերը: Աստված տա, որ մնացած երկու խաղերում մի քիչ էլ ավելացնեմ:

Հեղինակ` «Փաստինֆո»