Փաստ ինֆո

Կենտրոնական ընտրական հանձնաժողովն այսօրվա նիստում միաձայն որոշումներով մերժեց «Բարև Երևան» կուսակցությունների դաշինքի վստահված անձ Նարինե Ղազարյանի 4 դիմումներով վարչական վարույթի հարուցումը: Դիմումները վերաբերում էին նախընտրական քարոզչության ժամանակահատվածում ՀՀԿ-ի նախընտրական շտաբերի ծախսերին: ԿԸՀ-ն գտավ, որ  դիմումատուն չի հանդիսանում նշված հարցով ընտրական հանձնաժողով դիմում ներկայացնելու իրավունք ունեցող սուբյեկտ, ուստի նրա կողմից ներկայացված դիմումները չեն համապատասխանում Ընտրական օրենսգրքի պահանջներին, ավելին՝ ներկայացված դիմումները չեն պարունակում որևէ հիմնավորում, թե վստահված անձի որ իրավունքների խախտմանն են վերաբերում դիմումներով ներկայացված հանգամանքները:

Ն.Ղազարյանը, մասնավորապես, խնդրել էր կատարել Երևանի ավագանու ընտրությունների նախընտրական շրջանում ՀՀԿ-ի բազմաթիվ նախընտրական շտաբերի ծախսերի մանրակրկիտ հաշվարկ և հրապարակել այդ տեղեկատվությունը՝ կասկած հայտնելով, որ կուսակցության կողմից Երևանի տարածքում նախընտրական շրջանում բացված բազմաթիվ շտաբեր, որոնց ոչ բոլոր ծախսերն են կատարվել նախընտրական հիմնադրամներից:

Դիմումատուն պահանջում էր նաև ՀՀԿ-ի նկատմամբ կիրառել Ընտրական օրենսգրքի 26-րդ հոդվածի 3-րդ մասի դրույթը: Այն է՝ եթե հիմնավորվում է, որ նախընտրական քարոզչության համար մատուցված ապրանքը կամ ծառայությունը շուկայական արժեքով չի ներառվել նախընտրական հիմնադրամի ծախսերում, ապա ԿԸՀ-ն որոշում է կայացնում` պարտավորեցնելով կուսակցությանը հիմնադրամի ծախսերում չներառված ծախսերի եռապատիկի չափով գումար փոխանցել պետական բյուջե:

Նույնաբովանդակ դիմումներով Ն.Ղազարյանը ԿԸՀ էր դիմել մայիսի 6-ին՝ որպես քաղաքացի: Այդ դիմումները ԿԸՀ-ն մերժել էր մայիսի 8-ի նիստում՝ նույն հիմնավորմամբ: գտնելով, որ դիմումատուն , Ընտրական օրենսգրքի համաձայն, չի հանդիսանում  բողոքարկող սուբյեկտ:

ԿԸՀ-ն մերժեց նաև ՀՀԿ-ի նախընտրական ծախսերի հայտարարագրման հետ կապված «Բարև Երևան» կուսակցությունների դաշինքի ընտրական ցուցակով Երևանի  ավագանու թեկնածու առաջադրված Դանիել Իոաննիսյանի դիմումը:

Դիմումատուն, մասնավորապես, նշել էր, որ երկու տրանսպորտային միջոցներով մատուցված գովազդային ծառայության դիմաց ՀՀԿ-ի ներկայացրած ծախսերն անարժանահավատ են: Մասնավորապես, 2 մեքենաների վրա փակցված քարոզչական պաստառներով շարժական գովազդային ծառայության դիմաց ներկայացվել էր 200 հազար դրամի ծախս, մինչդեռ իրենք պարզել են, որ ՀՀԿ-ին այդ ծառայությունը մատուցած ընկերության յուրաքանչյուր մեքենյով նման ծառայության ամսական արժեքը 2 մլն դրամ է: Ըստ այդմ, ՀՀԿ-ն շուկայական արժեքից 3 մլն 800 հազար դրամ ծախս պակաս է հայտարարագրել:

ԿԸՀ Վերահսկիչ-վերստուգիչ ծառայության ղեկավարի պարզաբանմամբ, ՀՀԿ-ին այդ ընկերությունը քարոզչական ծառայություն է մատուցել օրվա ընթացքում ընդամենը 5 ժամ և իր կողմից մատուցվող ծառայության ծավալի 1/ 5 –ի չափով, ուստի 200 հազար դրամ արժեքն արժանահավատ է: Ծառայության ղեկավարն ընդգծեց, որ «Բարև Երևան» կուսակցությունների դաշինքի կողմից մեկ այլ ընկերության նմանատիպ ծառայուններից օգտվել է նույն՝ 200 հազար դրամ արժեքով:

ԿԸՀ-ի որոշումները դիմումատուները կարող են բողոքարկել Վարչական դատարան՝ 3 օրացուցային օրվա ընթացքում: