Փաստ ինֆո

33-ամյա ՀՀ քաղաքացի Կարեն Սիմոնյանը մեղադրվում է «Արմենիա Միջազգային Օդանավակայաններ» ՓԲԸ տնօրենից համակարգչային տեխնիկայի օգտագործմամբ առանձնապես խոշոր չափերով` 80 մլն ՀՀ դրամ գումար հափշտակելու փորձ կատարելու մեջ:

Այսպես, ըստ մեղադրանքի, նա շահադիտական դրդումներից ելնելով, «Արմենիա Միջազգային Օդանավակայաններ» ՓԲԸ տնօրեն` Խուան Պաբլո Գեչիջյանից խաբեությամբ առանձնապես խոշոր չափերով գումար հափշտակելու դիտավորությամբ, 2013թ. հունվարի 20-ին, Երևանում գործող ինտերնետ ակումբում բացել է «ahmed [email protected]» էլեկտրոնային հասցեն, որից 2013թ. հունվարի 21-ից փետրվարի 14-ն ընկած ժամանակահատվածում Երևանի տարբեր վարչական շրջաններում գործող ինտերնետ ակումբներից` Խուան Պաբլո Գեչիջյանին և նրա ընտանիքի անդամներին սպանելու սպառնալիքներով էլեկտրոնային հաղորդագրություններ է ուղարկել վերջինիս կողմից օգտագործվող` «[email protected]» էլեկտրոնային հասցեին: Հաղորդագրություններում, ըստ մեղադրանքի, «իրականության հետ որևէ կապ չունեցող, անիրագործելի և Խուան Պաբլո Գեչիջյանին խաբելու միտումով ուղարկված հանցավոր սպառնալիքներն ի կատար չածելու դիմաց պահանջել է վճարել 80 մլն ՀՀ դրամ գումարը»:

Սակայն, Խուան Պաբլո Գեչիջյանի հաղորդման հիման վրա ՀՀ ԿԱ ԱԱԾ աշխատակիցների կողմից իրականացված օպերատիվ հետախուզական միջոցառումների շնորհիվ հանցագործությունը բացահայտվել է:

Կարեն Սիմոնյանին մեղադրանք է առաջադրվել ՀՀ քրեական օրենսգրքի 34-181-րդ հոդվածի երրորդ մասի առաջին կետով, խափանման միջոց ընտրվել է կալանավորումը:

Գործն ընդունվել է Երևանի Շենգավիթ վարչական շրջանի ընդհանուր իրավասության դատարանի դատավոր Նելլի Բաղդասարյանի վարույթ: