Փաստ ինֆո

Ըստ վկայի՝ լսելով, որ «Խաչիկենք» խոստացել են գումարի դիմաց դիմորդին  անվճար համակարգով ընդունել Ակադեմիա և չեն կատարել խոստումը, զանգահարել է Ակադեմիայի համակարգչային գրաֆիկայի և դեկորատիվ կիրառական արվեստի ամբիոնի վարիչ և ընդունող հանձնաժողովի պատասխանատու քարտուղար   Հայկ Փայասլյանին: Մեղադրողի այն հարցին, թե ինչու է զանգահարել վերջինիս, վկան պատասխանեց, որ իր մտածելով ռեկտորի բացակայության պայմաններում պատասխանատու քարտուղարն  է իրավասու անձը:  Այն հարցին, թե ինչ ասել  է   թե «ռեկտորի»  ու «Սվետայի»  ցուցակ («Փաստինֆո»՝ Ակադեմիայի պրոռեկտոր Սվետլանա  Գևորգյան), վկան պատասխանեց, որ Ակադեմիայի երկու մասնաշենքերն են, որտեղ անց էին կացվում քննությունները: 

 

Վկան պնդեց, որ Սվետլանա Գևորգյանը խնդրել է միայն տեսնել, թե  ինչպես են աշխատում դասախոսների երեխա  երեք դիմորդները՝ նրանց ծնողները անհանգստանում էին, որևէ այլ նպատակ չկար ու չէր կարող լինել: Իսկ Սվետլանա Գևորգյանն էլ պարզաբանեց, որ  «իմ պարտականությունների մեջ է մտնում գտնել Վան  Գոգ» և հավելեց, որ  երեք դիմորդներն էլ վճարովի համակարգով են ընդունվել Ակադեմիա:
 

Մեղադրող Կորյուն Փիլոյանը միջնորդեց նաև լրացուցիչ հարցաքննել ամբաստանյալներ Սվետլանա Գևորգյանին, Հայկ Փայասլյանին ու Խաչիկ Ազիզյանին: Հայկ Փայասլյանը հրաժարվեց հարցերին պատասխանելուց, իսկ մեղադրողն էլ հրաժարվեց Խ.Ազիզյանին հարցաքննելուց:    
 

Մայիսի 21-ի դատական նիստում դատաքննությունը լրացնելու միջնորդության շրջանակում կհարցաքննվեն ևս 4 վկաներ, որոնցից մեկը՝ վկա Կարեն Գասպարյանը կհարցաքննվի լրացուցիչ:

 

Ըստ մեղադրական եզրակացության,  «Երևանի գեղարվեստի պետական ակադեմիա» ՊՈԱԿ-ի պրոռեկտոր Ս. Գևորգյանը և Ակադեմիայի համակարգչային գրաֆիկայի և դեկորատիվ կիրառական արվեստի ամբիոնի վարիչ Հ. Փայասլյան՝ միաժամանակ լինելով 2012-2013 թթ ուսումնական տարվա ընդունելության քննությունների ընդունող հանձնաժողովի` համապատասխանաբար նախագահի տեղակալ և պատասխանատու քարտուղար, իրենց վերապահված լիազորություններն օգտագործել են ծառայության շահերին հակառակ:

 

Նրանք, ըստ մեղադրանքի, օգտագործելով իրենց պաշտոնեական դիրքը, 2012թ ապրիլին ակադեմիայի կերպարվեստի ֆակուլտետի դեկան Խ. Ազիզյանի միջնորդությամբ ընդունել են ակադեմիայի դիմորդ Էդուարդ Բարբարյանի ծնողներից` Ա. Ենոքյանից և Ա. Ֆահրադյանից, առանձնապես խոշոր չափերի 1.371.510 ՀՀ դրամին համարժեք 3.500 ԱՄՆ դոլար ստանալու առաջարկը: Այնուհետև 2012թ մայիսին Խ. Ազիզյանի միջոցով Ս. Գևորգյան և Հ. Փայասլյանը Ա. Ենոքյանից և Ա. Ֆահրադյանից ստացել են առանձնապես խոշոր չափերի` 1.371.510 ՀՀ դրամին համարժեք 3.500 ԱՄՆ դոլար կաշառք` ակադեմիայի դիմորդ Է. Բարբարյանի քննությունների արդյունքներն ակադեմիա ընդունվելու համար անցողիկ միավորներով ապահովելու միջոցով ակադեմիա ընդունելու համար: