Փաստ ինֆո

Երևանի ավագանու մայիսի 5-ի ընտրությունների քվեարկության արդյունքների վերահաշվարկները թիվ 11 և 12 ընտրատարածքային ընտրական հանձնաժողովներում ավարտվել են, իսկ թիվ 9-ում՝ ավարտվել են 9/2 և 9/10-ը ընտրատեղամասերի վերահաշվարկները: Այդ մասին «Փաստինֆո»-ի լրագրողին տեղեկացրեց Կենտրոնական ընտրական հանձնաժողովի նախագահի մամուլի քարտուղար Հերմինե Հարությունյանը՝ հավելելով, որ մյուսներում դեռ շարունակվում է:

Թիվ 9/2 ընտրատեղամասում «Բարև Երևան» դաշինքի ձայներից մեկ ձայն պակասել է` համարվելով անվավեր, իսկ 9/10-ում՝ արդյունքները մնացել են անփոփոխ»,- ասաց թիվ 9 ընտրատարածքային ընտրական հանձնաժողովի նախագահ Եղիշե Տերտերյանն՝ ավելացնելով, որ այն անձը ով բողոք է ներկայացրել 9/10-ը վերահաշվարկելու վերաբերյալ, նախ հանձնաժողովի նախագահին շնորհակաություն հայտնել, որ ընտրությունները անցել են անթերի, սակայն հաջորդ օրն իսկ բողոքել է, որ խախտումներ են եղել՝ պահանջելով վերահաշվարկ կատարել:

Եղիշե Տերտերյանի խոսքով՝ վերահաշվարկից հետո, երբ ոչ մի ձայնի տարբերություն չի եղել ակնհայտ է դարձել, որ բողոքը եղել է անհիմն:

Այս պահին թիվ 9 ընտրատարածքային ընտրական հանձնաժողովում ևս երկու ընտրատեղամասի արդյունքներ են վերահաշվարկվում:

Թիվ 11-ում վերահաշվարկի արդյունքում ՀՅԴ-ի օգտին քվեարկված 2 քվեաթերթիկ դրված է եղել ՀԱԿ քվեաթերթիկների մեջ, իսկ 1/6 ընտրատեղամասում՝ 5 -ով ավելացել է ՀՀԿ-ի ձայները, ևս 1-ով էլ ավելացել է ԲՀԿ-ի օգտին քվեարկած քվեաթերթիկները:

Թիվ 12-ում՝ 1 քվեաթերթիկ ավելացել է ՀՀԿ-ի օգտին, իսկ ԲՀԿ-ի քվեաթերթիկների թիվը 2-ով պակասել է,- ասաց Հերմինե Հարությունյանը:

Նկարը՝ Ֆոտոլուրի