Փաստ ինֆո

«Հայ ազգային կոնգրես»-ը ձևակերպել է Երևանի ավագանու ընտրարշավի հիմնական հարցը: «Մենք ներկայացրեցինք հանրության դատին, ինչպես նաև դատախազությանը, այն հանցագործությունների մասին տեղեկությունները, որոնք կատարվել են գործող քաղաքապետի կողմից»,- այսօրվա ճեպազրույցում հայտարարեց Ազգային ժողովի ՀԱԿ խմբակցության ղեկավար Լևոն Զուրաբյանը՝ նկատի ունենալով գործող քաղաքապետի հայտարարագրած գույքը:

«Ըստ էության ներկայացվել է իրենց իսկ ձեռքով փաստերի մի ցուցակ, որից հետևում է, որ քաղաքապետը, տարիներ շարունակ գրավելով պետական պաշտոններ, կուտակել է հսկայական մի ունեցվածք՝ տարբեր գնահատականներով 6-10 մլն ԱՄՆ դոլար արժողությամբ, սակայն իր իսկ խոստովանությամբ, նա դա ոչ ստացել է որպես ժառանգություն, ոչ կարողացել է գնել շնորհիվ իր օրինական աշխատավարձի, ոչ էլ ունեցել համապատասխան կողմնակի եկամուտներ»,- նշեց Լ.Զուրաբյանը՝ հավելելով. «ակնհայտ է, որ գործ ունենք ժողովրդին թալանելու հանցագործության հետ»:

Պատգամավորի համոզմամբ, առաջիկա ընտրությունները վերածվելու են այս քաղաքապետին և ՀՀԿ-ին անվստահության հանրաքվեի: «Մայիսի 5-ին մեր ժողովուրդը պետք է իր վճիռը կատարի՝ արդյոք տալիս է Հանրապետական կուսակցությանը ևս մի քանի տարվա թալանելու մանդատ, թե այնուամենայնիվ վերադարձնում է իշխանությունը ժողովրդին»,- ընդգծեց նա: