Փաստ ինֆո

«Ժառանգություն» կուսակցության  նպատակը միշտ եղել է ԵՄ  ստանդարտներին  համապատասխան կառավարման համակարգ ունենալը:  «Բարև Երևան» կուսակցությունների դաշինքի շտաբի փոխանցմամբ, այսօր այս մասին նշել է «Բարև Երևան» դաշինքի առաջին համարը ներկայացնող թեկնածու Արմեն Մարտիրոսյանը Եվրոպայի խորհրդի տեղական և տարածաշրջանային իշխանությունների կոնգրեսի պատվիրակության ղեկավար  Սթյուարթ Դիքսոնի և դիտորդական առաքելության մյուս ներկայացուցիչների հետ հանդիպմանը:

Ա.Մարտիրոսյանը մտահոգություն է  հայտնել, որ դիտորդական առաքելությունները տեսել են ինչպես խորհրդարանական, այնպես էլ նախագահական ընտրությունների խախտումները, այդուհանդերձ, նրանց գնահատմամբ, այդ ընտրությունները «մի քայլ առաջ էին»: Այդ պարագայում դժվար է Հայաստանում եվրոպական արժեքներ տարածել,- նշել է թեկնածուն:

Որպես ամենամեծ խոչընդոտ արդար ընտրությունների  կայացմանը` Արմեն  Մարտիրոսյանը հիշատակել է վարչական ռեսուրսի կիրառումը:   Խախտումների երկրորդ խմբին են  դասվում, ըստ  նրա,  ընտրակաշառքները, իսկ խախտումների երրորդ խմբում են քարոզարշավի խոչընդոտումը հանրապետական երիտասարդների կողմից:

Ի պատասխան   Ս. Դիքսոնի հարցի,  Ա.Մարտիրոսյանը նշել է, որ  ընտրացուցակների հետ կապված խախտումների դեմն առնելու  համար ինքը որպես պատգամավոր օրենսդրական նախաձեռնությամբ էր հանդես եկել, որով նախատեսվում էր ընտրացուցակների հրապարակումը ընտրություններից հետո: Ըստ Ա.Մարտիրոսյանի, հիմա բոլոր ընդդիմադիր կուսակցությունները կողմ են այդ օրենքի ընդունմանը, դա շատ արդիական խնդիր է՝ հաշվի առնելով, որ  3.5 մլն բնակչություն ունեցող Հայաստանից 1.5 մլն-ը արտագաղթել է:  Թեկնածուն նշել է նաև, որ   «Բարև Երևանը»` որպես այդ խախտումների դեմն առնելու մեխանիզմ, խնդրում է քաղաքացիներին բերել իրենց այն ծանոթների անուններն ու հասցեները, ովքեր չեն բնակվում Հայաստանում: Այժմ, ըստ նրա, «Բարև Երևանի» վստահված անձինք ունեն այդ անունների մի պատկառելի ցանկ  և  վերահսկելու են, որպեսզի նրանց փոխարեն քվեարկություն չիրականացվի: Որպես մեկ այլ մեխանիզմ  նշվել է  ընտրություններից հետո վերահաշվարկի դիմելը և ցուցակներից քաղվածք պահանջելը:

Դիտորդների այն հարցին, թե 40%-ից ավել ձայն չհավաքելու դեպքում  պատրաստ են  արդյոք կոալիցիա կազմել այլ ուժերի հետ, Արմեն  Մարտիրոսյանը պատասխանել է, որ «Բարև Երևան» դաշինքը պատրաստ է համագործակցել այլ քաղաքական ուժերի հետ, քանի որ իրենց համար առաջնայինը համակարգային փոփոխությունն է: