Փաստ ինֆո

Թերթի ուշադրության կենտրոնում է ապրիլի 23-ին Գյումրիում տեղի ունեցած դեպքը, որի շուրջ թերթի թղթակիցը զրուցել է Մարտուն Գրիգորյանի հետ:

Թղթակցի այն հարցին, որ ՀՀ ոստիկանապետը հայտարարել էր, որ որոշ պատգամավորներ փորձել են միջամտել քննության ընթացքին, ինչը կապվել է Մ.Գրիգորյանի անվան հետ, վերջինս պատասխանել է. «Մարդիկ միանգամից մտածեցին, ավելին` հաստատեցին, որ պատգամավորը, որի մասին խոսում էր ոստիկանապետը, դա, անխոս, Մարտուն Գրիգորյանն է:

Ցավոք, պետք է շտապեմ հիասթափեցնել վերոնշյալ խոսակցություններին հավատացողներին, քանի որ որևէ առիթով ոչ ոստիկանապետին, ոչ էլ տեղակալներից մեկին չեմ դիմել, չեմ զանգահարել ինչ-որ բան խնդրելու, քանի որ ինչպես սովորական քաղաքացիները, այնպես էլ ես, նրան մոտիկից չեմ ճանաչում, մտերիմ հարաբերությունների մեջ չեմ»:

Իսկ թղթակցի այն հարցին, թե ինչպես է պատգամավորը մեկնաբանում այն, որ Գյումրիում խոսակցություններ են շրջանառվում, որ նրա և Գյումրիի նախկին քաղաքապետ Վ.Ղուկասյանի միջև կա խորը թշնամություն, Մարտուն Գրիգորյանն ասել է. «Նախկին քաղաքապետի հետ չհասկացվածությունը չունի այլ հիմքեր, քան 2008թ. ընտրապայքարը:

Ղուկասյանը չի հաշտվում այն մտքի հետ, որ քաղաքապետի ընտրություններում 2008թ. առաջադրվել եմ իր դեմ, իսկ 2012թ. ԱԺ ընտրություններում հաղթել եմ հենց իրեն, որը հիմք է դրել քաղաքական դաշտում իր անկմանը: Նա չի կարողանում հաշտվել իրականության հետ ու անում է այն, ինչ տեսանելի է ու հասկանալի: Խեղդվող մարդն իր հետ մարդ է ուզում տանել:

Ինչ վերաբերում է վենդետային, մարզի դատախազի և հորս համատեղ բիզնեսին, պետք է մեկ անգամ ևս կրկնեմ, որ դրանք անհեթեթություններ են, պատվիրված խոսակցություններ»: