Փաստ ինֆո

2012թ-ին ֆինանսական վերահսկողության տեսչությունը կատարել է 73 ստուգում և 23 ուսումնասիրություն, 3 գործ ներկայացվել է ՀՀ գլխավոր դատախազություն, որից 2-ով հարուցվել են քրեական գործեր, կատարվում է քննություն: Այս մասին կառավարության նիստում հայտարարել է Ֆինանսների նախարարի ժամանակավոր պաշտոնակատար Վաչե Գաբրիելյանը: Ամենաարդյունավետ տարին, Վաչե Գաբրիելյանի խոսքով, 2011թ-ն է, երբ տեսչական ստուգումների արդյունքում սոցիալական ոլորտում տեղի ունեցած չարաշահումներից հնարավոր է եղել պետական բյուջե վերականգնել 11 մլրդ դրամ:

Պաշտոնական տվյալներով վերջին հինգ տարում պլանային ստուգումների քանակն ութ անգամ կրճատվել է. 2007թ-ին կատարվել է 312 ստուգում, 2008-ին՝ 285, 2009-ին՝ 157, 2010-ին՝ 65: Փոխարենը՝ ավելացել է դրանց արդյունավետությունը:

«Չնայած ստուգումների քանակը կտրուկ նվազել է՝ ռիսկերի վրա հիմնված վերահսկողությունն իրեն ամբողջովին արդարացնում է, որովհետև ցույց է տալիս, որ բարձրացել է նաև արդյունավետությունը։ Թիրախային ստուգում է իրականացվում առավել ռիսկային օբյեկտներում և ոլորտներում, և տեսնում ենք, որ ստուգումների քանակի ութ անգամ կրճատման արդյունքում վերականգնման ծավալը ոչ թե պակասել է, այլ ավելացել, -նշել է վարչապետ Տիգրան Սարգսյանը,- դա նշանակում է, որ 2013 թվականի համար պետք է ճիշտ թիրախներ ընտրենք, թե որոնք են այն ոլորտները, որտեղ ամենամեծ ռիսկերն են և որտեղ մենք կարող ենք ակնկալել մեծածավալ վերականգնումներ»։