Փաստ ինֆո

Կոտայքի մարզի ընդհանուր իրավասության առաջին ատյանի դատարանում շարունակվում է Յուրիկ Մկրտչյանի դեմ հարուցված քրեական գործի դատավարությունը:

Կոչումով փոխգնդապետ Յու.Մկրտչյանը մեղադրվում է միասնական դիտավորությամբ, կաշառք ստանալու պատրվակով 2011թ. մայիսի 6-ին ամբաստանյալ Արթուր Գրիգորյանի միջնորդությամբ, ապա նույն տարվա հոկտեմբերին իր աշխատասենյակում` ՊՆ շտաբի շենքում, երեք հազար ԱՄՆ դոլար կաշառք ստանալու մեջ:

Կաշառք տալու մասին հայտարարություն է տվել Էվելինա Սարգսյանը, ով հայտնել էր, որ որդուն ՀՀ տարածքում գտնվող զորամաս ուղարկելու համար ամբաստանյալը ստացել է նշված գումարը:

Թերթի ներկայացմամբ` գործի նյութերի ուսումնասիրությունից պարզվել է, որ կաշառք տալու հանգամանքը գործի քննությամբ չի հաստատվել, այդ իսկ պատճառով էլ Յու. Մկրտչյանին մեղսագրվել է հանցանք` նախատեսված ՀՀ քրեական օրենսգրքի 178-րդ հոդվածի հատկանիշներով:

Ըստ հոդվածագրի` Է.Սարգսյանը կաշառքի միջոցով որդուն Երևանում զինծառայության պահելու առաջարկով դիմել է Յու. Մկրտչյանին, ով հրաժարվել է և չի համաձայնել: Այնուհետև Է.Սարգսյանը դիմել է Յու.Մկրտչյանի մորը` խնդրելով գումարը վերցնել և զանգահարել որդուն, որպեսզի վերջինս իջեցնի իր որդուն Ղարաբաղ մեկնող ավտոբուսից:

Հեռախոսային գաղտնալսումներով ձեռք են բերվել կաշառք տալու հանգամանքը ժխտող ապացույցներ:

Թղթակցի հետ զրույցում Յու.Մկրտչյանի պաշտպանը նշել է. «Ըստ Է.Սարգսյանի հայտարարության` նա հայտարարություն տալուց առաջ ոմն իրավաբանից ստացել է իրավաբանական խորհրդատվություն, ինչը նշանակում է, որ նա տվել է ակնհայտ կեղծ հաղորդում կաշառք տալու մասին` համոզված լինելով, որ այդպիսի հայտարարության դեպքում կազատվի քրեական պատասխանատվությունից` մի կողմից և երկրորդ` հնարավոր կլինի որդու նկատմամբ պաշտպանական միջոց կիրառելու միջոցով նրան ծառայության պահել Երևանում` մինչև գործի ավարտը, ինչն արվել է»:

«Չկա կաշառք չի կարող լինել կաշառքի միջնորդություն և պաշտպանական կողմն ակնկալում է արդարացման դատավճիռ»,- եզրափակում է հոդվածագիրը: