Փաստ ինֆո

Եվրոպայի խորհրդի Խորհրդարանական վեհաժողովում հայկական պատվիրակությունն ակտիվորեն մասնակցել է ապրիլի 22-ից 26-ը Ստրասբուրգում գումարված ԵԽԽՎ-ի նստաշրջանի և հանձնաժողովների աշխատանքներին: Քննարկված բազմաթիվ հարցերի շուրջ հայ պատվիրակները, եթե անգամ ժամանակը սպառվելու պատճառով չեն հասցրել հնչեցնել իրենց ելույթները, դրանց գրավոր տեքստերը կցվել են նիստերի արձանագրություններին:

Ազգային ժողովում այսօր ամփոփելով Վեհաժողովի նստաշրջանի աշխատանքները, հայկական պատվիրակության ղեկավար Դավիթ Հարությունյանը և պատվիրակության անդամներից երկուսը՝ ՀՀԿ խմբակցության անդամներ Արփինե Հովհաննիսյանը և Նաիրա Կարապետյանը, ներկայացրին որոշ մանրամասներ: Մասնավորապես, նշվեց, որ հետմոնիտորինգային կարգավիճակում գտնվող Թուրքիայի հետ երկխոսության վերաբերյալ զեկույցի նախնական տարբերակում եղել են հայ-թուրքական հարաբերություններին ու երկու երկրների միջև ստորագրված արձանագրություններին վերաբերող «բավականին անհաջող ձևակերպումներ»: Դրանք, ինչպես նաև որոշ դեպքերում զեկույցի հեղինակի կողմից, հայկական պատվիրակների տեսանկյունից, տրվող անընդունելի մեկնաբանությունները մեր պատվիրակության անդամների աշխատանքի արդյունքում հաջողվել է հաղթահարել: Հարցի կապակցությամբ մեր պատվիրակներն իրենց առաջարկություններում հատկապես շեշտադրել են կրոնական փոքրամասնությունների ազատությունների, կրթական և սեփականության իրավունքների երաշխավորման անհրաժեշտությունը: Ըստ Դ.Հարությունյանի՝ չնայած զեկուցողների և թուրքական պատվիրակության համառ դիմադրությանը, հայկական պատվիրակության երկու առաջարկություններն էլ Վեհաժողովի պատվիրակների կողմից ընդունվել և ընդգրկվել են բանաձևում:

Ինչ վերաբերում է ԵԽԽՎ նախագահի նախաձեռնությամբ Հայաստանի և Ադրբեջանի պատվիրակությունների ղեկավարների պարբերաբար կազմակերպվող հանդիպումներին, ապա, ինչպես նշեց ԱԺ պատվիրակության ղեկավարը, հաշվի առնելով ադրբեջանական կողմի տարածած ապատեղեկատվությունը, ինքը ստիպված է ընդգծել, որ այդ հանդիպումները որևէ առնչություն չունեն ԵԽԽՎ-ի թ.1416 բանաձևով նախատեսված Լեռնային Ղարաբաղի խնդրով ժամանակավոր հանձնաժողովի աշխատանքների հետ:

Հայաստանին անմիջականորեն վերաբերող օրակարգային հարցի, այն է՝ ՀՀ նախագահի փետրվարի 18-ի ընտրությունների դիտարկման արդյունքների վերաբերյալ զեկույցի կապակցությամբ էլ Դ.Հարությունյանը վերահաստատեց իր գնահատականը, ըստ որի ինքն այն համարում է օբյեկտիվ, թեև որոշ գնահատականների հետ համամիտ չէ: Նա հավելեց նաև, թե ցավում է, որ քննադատական ելույթներ են ունեցել եվրոպացի որոշ պատգամավորներ, ովքեր ընդգրկված չեն եղել Հայաստանում դիտորդական առաքելություն իրականացրած պատվիրակության կազմում և իրենց թույլ են տվել դատողություններ անել այլոց կարծիքների հիման վրա: