Փաստ ինֆո

Մի շարք լրագրողական կազմակերպություններ այսօր դատապարտել են   2013թ. ապրիլի 23-ին, ժամը 17:30-ի մոտ  Երեւանի Նորքի 8-րդ զանգվածի բակերից մեկում  Տարոն Մարգարյանի քարոզարշավը  լուսաբանող iLur.am կայքի լրագրող Հակոբ Կարապետյանի նկատմամբ բռնարարքը:

Ժուռնալիստների «Ասպարեզ»  ակումբը,  «Հետաքննող լրագրողներ» ՀԿ-ն,  Երեւանի մամուլի ակումբը, «Ինտերնյուս» մամուլի   աջակցության ՀԿ-ն, Խոսքի ազատության պաշտպանության կոմիտեն, «Լրագրողներ hանուն ապագայի» ՀԿ-ն «դատապարտելով  լրագրողի նկատմամբ կատարված այս հարձակումը և  բռնությունը»,    իշխանություններից պահանջում են պատժել մեղավորներին և  ձեռնարկել համապատասխան միջոցներ` հետագայում նման վայրագությունները կանխելու նպատակով:

«Չպատժելու որևէ արդարացում անընդունելի է, քանի որ ակնհայտորեն այս հանցագործության բացահայտելը որևէ դժվարություն իրենից չի ներկայացնում: Եթե այս հանցագործությունը անհետևանք մնա, ոստիկանության ղեկավարության բազմաթիվ հայտարարությունները իրենց քաղաքական չեզոքության մասին դատարկ խոսքերի շռայլում կհամարենք»,- ասվում է լրագրողական կազմակերպությունների հայտարարության մեջ:

2013 թվի ապրիլի 23-ին, ժամը 17:30-ի մոտ iLur.am կայքի լրագրող Հակոբ Կարապետյանը Երևանի Նորքի 8-րդ զանգվածի բակերից մեկում լուսաբանելիս է եղել Տարոն Մարգարյանի քարոզարշավը, երբ մի քանի հոգի նրանից պահանջել են դադարեցնել նկարահանումները: Լրագրողը բացատրել է, որ իր մասնագիտական պարտականությունն է կատարում: Ըստ լրագրողի, Երևանի ավագանու ՀՀԿ-ական անդամ, ավագանու թեկնածու Աշոտ Պապայանը մոտեցել է իրեն և հայհոյելով սկսել է հարվածել լրագրողին: Նրան են միացել էլի մի քանի հոգի, սկսել են քաշքշել և   նույնպես հարվածել: Միջադեպին ներկա և  ականատես է եղել ոստիկանության մի մայոր, սակայն որևէ մեկը չի կասեցրել լրագրողի նկատմամբ գործադրվող բռնությունը: Այդ մարդիկ լրագրողի ձեռքից խլել են ֆոտոխցիկը: Քիչ անց մեկը վերադարձրել է ֆոտոխցիկը, որի միջից մաքրված են եղել բոլոր նկարահանած նյութերը: