Փաստ ինֆո

Բոլիվիայի իշխանությունները հայց են ներկայացրել ՄԱԿ-ի Հաագայի դատարան՝ պահանջելով վերականգնել դեռևս 19-րդ դարում Չիլլիի հետ տեղի ունեցած պատերազմի հետևանքով կորցրած իրենց երկրի ելքը դեպի ծով:

Բոլիվիայի արտաքին գործերի նախարարը հայտարարել է, որ իրենց ժողովուրդն իրավունք ունի վերականգնել ծովային երկիր լինելու կարգավիճակը: Նախարարը ապրիլի 20-ից գտնվում է Հաագայում և անձամբ է զբաղվում անհրաժեշտ փաստաթղթերի նախապատրաստման աշխատանքով:

Ըստ դատարանի կանոնադրության՝ այն կողմը, որը պահանջում է վեճն իր օգտին լուծել, պետք է ցույց տա իր բարի կամքը և փորձի անցյալի հիմնախնդիրը լուծել խաղաղությամբ: Բոլիվիացիները բազմիցս դիմել են Չիլլիին՝ խնդրելով իրենց վերադարձնել դեպի ծով դուրս գալու հնարավորությունը, սակայն միշտ մերժում են ստացել:

Սանտյագոն հայտարարում է, որ Բոլիվիայի հետ սահմանագծի հարցը կարգվորվել է դեռ 1904թ.ին, երբ պատերազմից հետո երկու երկրները ստորագրել են համապատասխան պայմանագիրը: BBC-ն նշում է, որ այդ պատերազմի վերջնական արդյունքով Բոլիվիան կորցրեց 400 կմ երկարությամբ ծովափ և օվկիանոս դուրս գալու հնարավորությունը:

Ավելացնենք, որ այսօր դեպի ծով ելք չունեցող Բոլիվիային նախկինում պատկանում էր Խաղաղ օվկիանոսից սկսվող Ատակամա անապատի մի մասը: Սակայն այդ տարածքը 1879-1883թթ. Երկրորդ Խաղաղօվկիանոսյան պատերազմի ընթացքում երկիրը կորցրեց: Չիլլին Մեծ Բրիտանիայի աջակցությամբ կարողացավ պարտության մատնել Բոլիվիայի և Պերուի միացյալ զինված ուժերին: Պատերազմի պատճառը Ատակամա անապատի տարածքում գտնվող սելիտրայի հանքերի վրա տիրապետություն հաստատելն էր, որոնք գտնվում էին անապատի բոլիվիական և պերուական մասում, բայց պատկանում էին չիլլիական մի ընկերության:

Խաղաղության դաշնագրի պայմաններով, որը 1884թ. ապրիլի 4-ին ստորագրվեց Բոլիվիայի և Չիլլի միջև, Բոլիվիան ստիպված էր հրաժարվել Անտոֆագաստա մարզից, հետևապես նաև՝ դեպի ծով ելքից:

Չիլլիի իշխանությունները հայտարարել են, որ իրենք չեն տա իրենց ինքնիշխան տարածքի որևէ հատված, նշում է BBC-ն: