Փաստ ինֆո

 «Նախաքննության ընթացքում արդեն իսկ ապացույցներ էին ձեռք բերվել, որ հանցագործությունը կատարել էր Վահե Անդրանիկի Ղուկասյանը: Ձեռնարկված միջոցառումներով նա այսօր հայտաբերվել, ներկայացել է ոստիկանության բաժին և ձերբակալվել է: Վահե Ղուկասյանի մարմնում նույնպես կան վնասվածքներ, էս պահին պարզվում է դրանց բնույթը: Վահե Ղուկասյանը խոստովանել է իր կողմից կատարված արարքը: Ձեռնարկված միջոցառումներով նա կամովին ներկայացել է»,- «Առավոտ» -ի փոխանցմամբ այսօր ասել է Շիրակի մարզի  դատախազ Կարեն Շահբազյանը:  Վերջինիս տեղեկացմամբ՝ դատաբժշկական փորձաքննություն է նշանակված՝ պարզելու, թե ի՞նչ տեսակի վնասվածքներ է ստացել Վահե Ղուկասյանը` հրազենայի՞ն, թե՞ այլ տեսակի:

Իսկ Վարդան Ղուկասյանի մյուս եղբորորդու` Նիկոլայի հետ կապված, դատախազը տեղեկացրեց, որ նա ոչ թե ձերբակալված է , այլ բերման է ենթարկվել,և նախաքննությունը կպարզի նա ներկա գտնվե՞լ է հանցագործության վայրում: Լրագրողների այն հարցին՝ ստացվեց, որ Կոլյա Ղուկասյանը անմե՞ղ է, դատախազն ասաց. «Դա կպարզի նախաքննությունը, մենք հիմա մեղավորության մասին չենք խոսում, էս պահին ունենք ձերբակալված մեկ անձ, երբ որ մեղավորության համար անհրաժեշտ ապացույցները ձեռք կբերվեն, կառաջադրվի մեղադրանք: Կոլյա Ղուկասյանը հայտնաբերվել է սահմանային կետը հատելիս, բերման է ենթարկվել, և նաև նրա այդ փորձը՝ դեպքից անմիջապես հետո հանրապետությունից անմիջապես դուրս գալու, նույնպես նախաքննության քննարկման առարկա է դառնում. ի՞նչ նպատակով էր մարդը փորձում դեպքից հետո դուրս գալ հանրապետությունից: Ապացույցների ձեռք բերման ընթացքում նոր միայն արարքին կտրվի գնահատական»:

Դատախազը մասնակիցների թվի քանակի հետ կապված ասաց, որ կան բազմաթիվ վարկածներ, սակայն դա կպարզի նախաքննությունը, բոլոր անձանց ցուցմունքները ստուգման են ենթարկվելու: Գյումրու նախկին քաղաքապետի ու նրա մերձավորների երեկ երեկոյան ոստիկանություն բերման ենթարկելու հետ կապված էլ, Կարեն Շահբազյանը տեղեկացրեց, որ նրանք հարցաքննվել են դեպքի առնչությամբ, և ոչ միայն Վարդան Ղուկասյանը, նրա որդին կամ կողմնակիցները , այլեւ բազմաթիվ անձիք, այդ թվում նաև տուժած կողմը: «Պետք չէ հարցերը ենթատեքստերով ուղղել Ղուկասյանների ընտանիք, ունենք կատարված հանցագործության դեպք՝ անկախ նրանից ով է կատարողը: Ինձ համար և իրավապահ մարմինների համար կա կատարված առանձնապես ծանր հանցագործություն` անկախ նրանից, թե կատարողներն ովքեր են: Պետք չէ եղանակ ստեղծել, և ազգաբնակչության մոտ ստեղծված իրավիճակը անհրաժեշտ է փարատել, որ Ղուկասյաններն են կատարողը, Պողոսյաններն են կատարողը և այլն, և այլն: Ունենք առանձնապես կատարված ծանր հանցագործության դեպք, էսօրվա դրությամբ հայտնաբերվել է այն կատարող անձը»:

Դատախազի տեղեկացմամբ, ձեռնարկվում են միջոցառումներ հանցագործության գործիքը հայտնաբերելու ուղղությամբ: Իսկ թե զենք եղե՞լ է տուժածներից մեկի` քավոր Հարութի մոտ, դատախազն ասաց, որ դեպքի վայրում երկու տեսակի, երկու տրամաչափի պարկուճներ են հայտնաբերվել, որը հիմք է տալիս հիմնավոր ասելու, որ դեպքի վայրում կրակոցներ են արձակվել երկու տեսակի զենքից: Դատախազի տեղեկացմամբ, հարցաքննվել են բազմաթիվ ականատեսներ-վկաներ , որոնք արդեն իսկ վստահություն են ցուցաբերում իրավապահ մարմինների նկատմամբ՝ցուցմունքներ տալով: Ստեղծվել է օպերատիվ խումբը, որը կազմված է հանրապետության ոստիկանության, ոստիկանության Շիրակի մարզային վարչության և Գյումրի քաղաքի ոստիկանության բաժնի կողմից:

Աղբյուրը` aravot.am