Փաստ ինֆո

Ապրիլի 19-ից մեկնարկում է «Նոր Հայաստան» քաղաքացիական շարժման ձևավորումը։ Այն լինելու է քաղաքացիական դաշինք, որին կարող են անդամագրվել նաև տարբեր կուսակցությունների ներկայացուցիչներ անխախտելի մի պայմանով, որ պայքարի մղումը բարձր է դասվելու կուսակցական շահախնդրություններից: Այս մասին այսօր «Անի» հյուրանոցի դահլիճում կայացած հավաքի սկզբին հայտարարեց Րաֆֆի Հովհաննիսյանը։

Շարժման ձևավորման գաղափարը ողջունեցին տարբեր կուսակցությունների ղեկավար ներկայացուցիչներ:  ՀՅԴ Հայաստանի Գերագույն մարմնի ներկայացուցիչ, Ազգային ժողովի ՀՅԴ խմբակցության ղեկավար Արմեն Ռուստանյանի խոսքն ուղեկցվեց լեփ-լեցուն դահլիճի «Միացում» վանկարկումներով: Ելույթներ ունեցան նաև քաղաքացիական նախաձեռնությունների ներկայացուցիչներ, հասարակական գործիչներ:

Ր.Հովհաննիսյանն ընթերցեց շարժման առաջիկա մեկ ամսվա ծրագիրը: Ըստ այդմ, ապրիլի 22-ին վերսկվում են մարզային առաքելությունները, որոնք այս անգամ կլինեն դահլիճային: «Սրանք մեր «Նոր Հայաստան» շարժման քաղաքացիական ազգային ճակատի առաջին տեղեկատվական հանդիպումներն են, որոնց միջոցով պիտի զեկուցենք մեր հայրենակիցներին մեր ապագա ծրագրերի մասին, բանավիճենք, տեսակետը ստանանք և բերենք այդ բանավեճը և վերջնական որոշումը Երևան»,-հայտարարեց Ր.Հովհաննիսյանը:

Ապրիլի 22-ին հանդիպումներ կլինեն Վանաձորում, Գյումրիում, ապրիլի 23-ին՝ Նոր Հաճնում, Թալինում: Շարժման մասնակիցներն այդ օրը գիշերը Երևանում կմիանան ՀՅԴ երիտասարդության ավանդական ջահերի երթին դեպի Ծիծեռնակաբերդ:

Ապրիլի 24-ին` ժամը 12-ին Ազատության հրապարակից երթ դեպի Ծիծեռնակաբերդ:

Ապրիլի 25-ին հանդիպումներ Գավառում և Իջևանում, ապրիլի 26-ին՝ Էջմիածնում և Արտաշատում, ապրիլի 27-ին՝ Եղեգնաձորում և Կապանում:

Մայիսի 1-ին՝ ժամը 15-ին, «Բարև Երևան» դաշինքը, որը, ինչպես նշեց Ր.Հովհաննիսյանը,  «կազմելու է մեծամասնություն իր գործընկերների հետ մեկտեղ ապագա ավագանիում և քաղաքապետարանում, Ազատության հրապարակում ունենալու է իր ավարտական հավաքը»:

«Մայիսի 5-ին ընտրություն է , ազատ ընտրեք, գաղտնի ընտրեք, բարևով ընտրեք»,-կոչ արեց նա:

Մայիսի 9-ին՝ տոնական հաղթական օրը, ժամը 15-ին Ազատության հրապարակում գումարվելու է «Նոր Հայաստան» շարժման քաղաքացիական հաջորդ ժողովը, որտեղ կամփոփվեն մեկ ամսվա արդյունքները:

Ր.Հովհաննիսյանը հայտնեց նաև, որ չի բացառվում, որ մայիսի 18-ին Երևանում, հավանաբար, մեծ դահլիճում «մենք պիտի կնքենք մեր ժողովրդի, քաղաքացիների, քաղաքական ուժերի, քաղաքացիական նախաձեռնությունների հետ «Նոր Հայաստան»-ի պայմանագիրը՝ նոր քաղաքապետի, ավագանու գլխավորությամբ»:

Շուրջ երկու ժամ տևած քաղաքացիական ազգային համաժողովի ավարտին Ր.Հովհաննիսյանը մասնակիցների հավանությանը ներկայացրեց «Նոր Հայաստան» շարժման ապրիլի 19-ի հռչակագիրը. «Մենք՝ ՀՀ քաղաքացիներս, սույնով մերժում ենք գործող իշխանակարգը, որը քաղաքական դավադրություն նյութեց 2013թ.-ի փետրվարի 18-ին՝ կեղծելով ժողովրդի կամքը և բռնի կերպով զավթելով մեր հանրապետության նախագահությունը։ Մենք չենք ճանաչում նոր վարչակազմի իշխանությունը և այսօր հավաքվել ենք ուղենշելու միասնական այս գործընթացի սկզբունքները, որը կհանգեցնի նրա ինքնահրաժարմանը, այնուհետև՝ մեր ազգային վերածննդի կենսակոչմանը: Իշխանությունը ժողովրդին վերադարձնելու մեր ծրագիրը մշակելու և իրականացնելու գործում ամբողջապես լիազորված ենք ՀՀ Սահմանադրության 2-րդ հոդվածով, ինչպես և մեր անօտարելի ազատության առավել բարձրյալ աղբյուրներով»։

Ր.Հովհաննիսյանն ընդգծեց, որ «սրանից պիտի բխեն բոլոր մնացած փաստաթղթերը, քննարկումները, բանավեճերը, որոնք պիտի միս ու արյուն տան մեր հաղթանակին»:

Լուսանկարը` Ֆոտոլուրի