Փաստ ինֆո

Արարատի և Վայոց ձորի մարզերի ընդհանուր իրավասության առաջին ատյանի դատարանի Վեդիի նստավայրում ընթանում է 10 զինծառայողների գործի դատավարությունը:

Ամբաստանյալի աթոռին են հայտնվել վաշտի հրամանատար Գ.Բեգիջանյանը, պայմանագրային զինծառայողներ, կոչումով ավագ սերժանտ Ա.Փամբուկյանը, սերժանտներ Գ.Դումոյանը, Հ.Քարամյանը, Հ.Սարոյանը, եֆրեյտոր Ն.Հովհաննիսյանը, շարքայիններ Գ.Հակոբյանը, Ս.Կարապետյանը,Ա.Ֆոլյանը և Յ.Օսիպյանը:

Ըստ մեղադրանքի` նշված զինծառայողներն, առանց ավագ պետին զեկուցելու և նրա թույլտվությունը ստանալու, թողել են իրենց պահպանությանը հանձնված տարածքը, հենակետում խմել են, իրենց պահել անվայել, ծեծկռտուքներ սարքել:

2012թ. ապրիլի 9-ին` ժամը 13-ի սահմաններում, խումբը կազմակերպել է խնջույք` զինծառայողներից մեկի երեխաների կնունքի արարողության կապակցությամբ: Խնջույքի ժամանակ Ա.Փամբուկյանն իրեն պարզաբանող կարգելով ու ինքնադատաստան տեսնելու իրավասություն ստանձնելով, իր մոտ է կանչել Յ.Օսիպյանին` դեռ փետրվար ամսին նրա ու սերժանտ Ազոյանի միջև տեղի ունեցած վիճաբանության հետ կապված պարզաբանումներ կատարելու նպատակով: Այնուհետև նույն օրը երեկոյան Փամբուկյանը Գ.Հակոբյանի, Գ.Դումոյանի, Ն.Հովհաննիսյանի հետ ծեծել են Ազոյանին: Սակայն պարզելով, որ ոչ թե Ազոյանն է հայհոյել Օսիպյանին, այլ` հակառակը, նույն խումբը ծեծի է ենթարկել Օսիպյանին:

Արդյունքում` Օսիպյանը, հայտնվելով հուսահատության, շփոթվածության ու սթրեսային վիճակում, ապրիլի 10-ին` առավոտյան ժամը 04:00-ի սահմաններում, խոհարարական դանակով ինքնասպանության փորձ է կատարել` որովայնի շրջանում պատճառելով առաջնային պատի կտրած-ծակած թափանցող վերք, որը վտանգավոր է եղել կյանքի համար:

Ամբաստանյալների մի մասը կալանքի տակ է, մյուս մասը` ազատության մեջ: