Փաստ ինֆո

«Bank of America»-ի վերլուծաբան Ասանասիոս Վամբակիտիսն առաջարկել է Եվրոպական կենտրոնական բանկին (ԵԿԲ) շրջանառությունից դուրս բերել 500 եվրո արժեքով թղթադրամները:

«Բեն Լադեն» մականունը ստացած այդ թղթադրամներն, ըստ առաջարկության հեղինակի, իրենց էությամբ նույն են, ինչ որ հայտնի ահաբեկիչը՝ բոլորը գիտեն դրանց գոյության մասին, սակայն շատ քչերին է վիճակվում տեսնել:

Վամբակիտիսի կարծիքով՝ այդպիսի որոշումը հնարավորություն կտա թուլացնել եվրոպական արժույթը, դրանով իսկ ավելացնելով ապրանքների արտահանումը և բնակչության զբաղվածությունը: Ամենախոշոր դրամական միավորի դուրս բերումը շրջանառությունից ԵԿԲ -ին հնարավորություն կտա ի հայտ բերել անմաքուր եղանակներով կուտակած փողերի տերերին, որոնք, որպես օրինաչափություն, իրենց կարողությունը պահում են հիմնականում հենց այդ թղթադրամներով:

Նշենք, որ դեռ պարզ չէ, արդյո՞ք կհետևի Եվրոպական կենտրոնական բանկը ամերիկյան բանկի վերլուծաբանի խորհրդին, թե ոչ, սակայն հայտնի է, որ անցյալ տարի ԵԿԲ-ի նախագահ Մարիո Դրագին հայտարարել էր, որ դրամատունը չի պատրաստվում այդ դրամանիշերը հանել շրջանառությունից, քանի որ դրանք կարևոր դեր են կատարում որպես արժեքի պահպանման միջոց: Անգլիական «Serious Organized Crime Agency» (SOCA) հատուկ ծառայության տվյալներով՝ 500 եվրո նոմինալով թղթադրամների 90 տոկոսը գտնվում է կազմակերպված հանցավոր կառույցների ձեռքում:

Անհրաժեշտ է, որպեսզի ԵԿԲ-ն հայտարարի, որ բոլոր 500 եվրո թղթադրամ ունեցողները պետք է մեկ ամսվա ընթացքում դրանք ավանդների ձևով դնեն եվրոպական բանկերում, գտնում է Ասանասիոս Վամբակիտիսը: Ընդ որում՝ ավանդատուները պետք է ներկայացնեն տեղեկանքներ և փաստաթղթեր այդպիսի թղթադրամներով կուտակված միջոցների օրինական ծագման մասին: Հակառակ պարագայում վարկատու կազմակերպությունները պետք է հրաժարվեն այդ փողերն ընդունել: Իսկ եթե ԵՄ-ի քաղաքացիները չհասցնեն կամ չկարողանան այդ փողերը դնել բանկային հաշիվներում, ապա ԵԿԲ-ն պետք է նրանց մոտ մնացած թղթադրամները հայտարարի «Եվրոպական կենտրոնական բանկի շահույթը», այսինքն՝ դրանք չեղյալ համարի: