Փաստ ինֆո

«Ես, ցավոք սրտի, Նոստրադամուսը չեմ՝ ի տարբերություն, պարզվեց, այստեղ 999 պրոբի բազմաթիվ Նոստրադամուսների, որոնք հայտարարեցին, որ հանձնաժողովը չի կարող արդյունավետ աշխատել, հանձնաժողովից սպասելիքներ չպետք է ունենալ, սա քննչական մարմին չէ», - ԱԺ-ի այսօրվա նիստում հայտարարեց «Բարգավաճ Հայաստան» խմբակցության քարտուղար Նաիրա Զոհրաբյանը՝ ներկայացնելով 2008թ. մարտի 1-2-ին Երեւան քաղաքում տասն անձանց մահվան, քաղաքացիական անձանց, ոստիկանության աշխատակիցներին ու զինծառայողներին հրազենային ու այլ մարմնական վնասվածքներ պատճառելու դեպքերով ՀՀ ոստիկանության, Հատուկ քննչական ծառայության և ՀՀ գլխավոր դատախազության ձեռնարկած միջոցառումների ու գործողությունների հիմնավորվածության հարցը ուսումնասիրող ԱԺ-ի ժամանակավոր հանձնաժողով ստեղծելու մասին որոշման նախագծի վերաբերյալ խմբակցության դրական կարծիքը:

Նա ընդգծեց, որ հակված չէ կանխակալ գնահատականների, բայց անհրաժեշտ է համարում ԱԺ-ին տալ մարտի 1-ի դեպքերի հետ կապված հանրության շրջանում առկա հարցերին արձագանքելու հնարավորություն:

Որպես նույն դեպքերի ուսումնասիրության նպատակով նախորդ գումարման ԱԺ-ում ստեղծված ժամանակավոր հանձնաժողովի անդամ՝ Ն.Զոհրաբյանը նշեց, որ համաձայն է այն տեսակետին, թե «ասել, որ այդ հանձնաժողովը ոչինչ չարեց՝ դա ազնիվ և արդար չի լինի, բայց ասել, որ հանձնաժողովն իր առջև դրած գերակա և հիմնական խնդիրները լուծեց՝ նույնպես ազնիվ և արդար չի լինի»: «Մենք հիմնական եզրակության մեջ ամրագրեցինք, որ 10 մահվան հանգամանքների հետ կապված մեզ չհաջողվեց այդ խնդրի սպառիչ, հիմնավոր և հանրությանը բավարարող պատասխան տալ, ուստի թույլ տանք, որ այս հանձնաժողովը կարողանա այդ խնդիրը լուծել»,- հայտարարեց Ն.Զոհրաբյանը:

Հարակից զեկուցող՝ ԱԺ պետական-իրավական հարցերի մշտական հանձնաժողովի նախագահ, հանրապետական Դավիթ Հարությունյանը՝ ներկայացնելով հանձնաժողովի դրական եզրակացությունը, նշեց, որ տարիներ շարունակ, քանի դեռ պատասխաններ չեն գտնվել, այս խնդիրը շարունակելու է մնալ քաղաքական օրակարգում՝ անկախ որևէ մեկի ցանկությունից: Ըստ նրա, այս հանձնաժողովը կարող է կատարել շատ կարևոր աշխատանք, եթե զերծ մնա քաղաքականացումից:

Հանրապետական որոշ պատգամավորներ, սակայն, հարցականի տակ դրեցին նոր հանձնաժողովի ստեղծման անհրաժեշտությունը և դրա իրավական հիմնավորվածությունը, ինչը հարուցեց նախկին հանձնաժողովի կազմում ՀՅԴ խմբակցության ներկայացուցիչ Արծվիկ Մինասյանի մտահոգությունը. «Բացարձակ աբսուրդ եմ համարում նման հարցական դնելը»:

Դաշնակցական պատգամավորը նշեց նաև, որ վատ ավանդույթ կձևավորվի, եթե հանձնաժողովի ստեղծման վերաբերյալ ամիսներ տևած քննարկումների արդյունքում ձեռք բերված քաղաքական համաձայնությունը խախտվի և «այս հանձնաժողովի ստեղծումը քաղաքական մեծամասնությունը փորձ անի տապալել»: Ըստ նրա, այդ դեպքում քաղաքական մեծամասնությունը չի կարողանա հիմնավորել, թե ինչու մինչ այժմ համաձայն էր.  «Բացառությամբ մեկ նպատակի, որովհետև նախընտրական շրջան էր, և դուք ուզում էիք ինչ-որ ձևով մեղմել այս հարցի լուծումը և փորձ արեցիք մանիպուլյացիա կատարել»: